Da ka Common Platform ba shisngi yn pynlong ka DS Khimusniang ïa ki kyrtong MLA

0

Jowai, K’Lyngkot 23: Ka Dorbar Shnong Khimusniang (DSK), Jowai kala pynban paidbah ba ka shnong kan pynlong da ka ‘Common Platform’ ba sngi ïa baroh ki kyrtong ki ban ïakhun ïa kane ka Election MLA 2023 na ka 2-Jowai Constituency, kane ka Common Platform kan long haka 9 tarik u Rymphang 2023 ha Indoor Sports Hall jong ka Shnong haka por 7 baje janmiet.
Na ka liang u Secretary ma W. Bamon ula ong ka Dorbar Shnong Khimusniang kala rai ban pynlong ïa kane ka ‘Common Platform’ kan ïarap shibun eh ïa ka shnong ban lait na kino kino ki jingawri awra lada don bun sngi ki jingïalang paidbah hapoh ka shnong.
Katkum kine ki kyndon jingmana ka shnong kan shah tang 5 ngut ki briew ba nabar kynthup ïa u Kyrtong bad ar tylli ki kali ban rung shapoh ka shnong. Ha kane ka Common Platform yn wan ban sngap tang da ki nongshong shnong halor ki nongrim jong ki kyrtong kiba kwah ban pynsngew ïa ki mat jong ki.
Ka shnong kala maham ruh ïa baroh ki seng saiñ hima sima ba ym shah ban sam pisa hapoh ka shnong, lada lap ïa kino kino kiba pynkheiñ ïa kane ki lah ban shah pynshitom katkum ki kyndon aiñ jong ka shnong bad yn aiti beit sha ki bor jong ka aiñ.
Ka shnong kala khang pyrshah ïa ki trai shnong bad kumjuh ïa kiba nabar shnong ban tem ne pynheh sur jingrwai hapoh ki kali bad kumjuh ïa kiba ïaid sharum shaneng hapoh u pud u sam ka shnong,
Na ka liang ka Dorbar Shnong ka kyrpad ïa ki kyrtong baroh ba kin burom bad kohnguh ïa kane ka jingpynbeit jong ka shnong khnang ba kan long kaba ïaid beit ïaid ryntih.

Leave A Reply

Your email address will not be published.