Ka jingthep vote ha ki Shnong ba dang ïa pynbeit pud kin ïaid beit ïaid ryntih’ ong u DC ka Ri Bhoi

0

Nongpoh, Kyllalyngkot 23: Kum ha kane ka kynti ki don ki shnong kiba dang artatien halor ka jingthep vote ba ka jingïapynbeit pud kam pat dep pura bad na ka liang u Deputy Commissioner ka Ri Bhoi mynta ka sngi u la pynshai paidbah ba ka jingthep vote ha kito ki shnong ba dang ïa kajia pud ruh kan ïaid beit ïaid ryntih kumba ka ju long baroh shi katta.
Haba kren sha ki Nongthoh Khubor, u Arpit Upadhayay, Deputy Commissioner ka Ri Bhoi, u la ong ba na ka bynta ka jingthep vote ha kane ka election 2023 hapoh ka jylla Meghalaya kan nym don kano kano ka jingktah ha ki shnong ba dang ïa kajia pud bad kum ka bor District ka la dep ban ïa kren sha ki Deputy Commissioner ka Assam ba kin shim khia lang ban nym don kano kano ka jingshah pynthud ïa ki paidbah ha ka jingthep vote.
U la ïathuh ruh baroh ki Polling Station kiba la don lypa kin long beit ka jaka thep vote ha ki Shnong khappud ba dang don ka jingïakajia pud bad kito hi kiba don kiba la don ka Epic kan lah beit ban thep vote bad kan nym don kano kano ka jingnïapher wat la ki ar sorkar kim pat lah ban pynthikna ha ka jingïapynbeit pud hapdeng ka Meghalaya bad ka Assam.
U la kyntu ruh ïa ki paidbah ha ki shnong khappud ba kim dei ban sngap ïa kino kino ki jingpynïalam bakla bad kum ki nongshong shnong kiba la don ïa ka EPIC ki don ïa ka hok ban leit thep vote lane ban jied ïa kito ki nongmihkhmat kaba dei katkum ka mon jong ki, u la bynrap.

Leave A Reply

Your email address will not be published.