Nongpoh, Lber 08: Ka kynhun jong ka Surya Kiran Aerobatic Team jong ka Indian Air Force mynta ka sngi kala pyni nam ïaki liengsuiñ ïapom ha pung Umiam bala wan ruh ban sakhi da ki spah ngut ki paidbah ban iohi ïaka sap bad ka jingtbit jong ki shipai ñiah liengsuiñ ka ri, kaba dei ruh shibynta ka jingrakhe ïaka sngi kyrpang jong ki kynthei ne ka International Women’s Day.
Ha katei ka sngi ka jingpyninam ïaki liengsuiñ ïapom ka Indian Air Force la wan ruh ban sakhi da u Phagu Chauhan u lat ka jylla, u Conrad Sangma Myntri Rangbah ka jylla ryngkat ki heh shipai jong ka Indian Air Force.
Lyngba katei ka sngi ki shipai suiñ jong ka Ri kila pyni ïala ka jong ka sap ka phong da kaba dro dur ha suiñbneng kaba shai bad itynnad jong ka pung Umiam da ki liengsuiñ bala tip kum ka Cheetah Helicopter, SU-30 MKI Rafale bad Hawks bala pynshoh biej ïakiba bun ki paidbah khamtam ka jingdro ïa u dohnud ha suiñbneng kum ka jinglehkmen ïaka sngi kyrpang ki longkmie kiba la don bynta ruh bun ngut bad ka Indian Air Force.
Haba kren ha katei ka sngi naka liang u Myntri Rangbah ka jylla u Conrad K Sangma u la pynpaw ka jingsngewkmen ban sakhi haka sien ba nyngkong da la ki jong ki khmat ïaka sap jong ki shipai suiñ bad kane ka pyni ïaka jingtriem ka jong ki kaba long ka jingsarong ïaki paidbah ka ri hi baroh kawei ban long kum ki nongïada ïaka ri.
U la ong ruh lyngba ka jingpyni nam jong ki shipai ha katei ka sngi kan long ruh ka jingai mynsiem ïa kiba bun ki khun samla ban khring sha ka kam shipai Indian Air Force, ban long ki nongïada jong ka ri na suiñ.
Kawei naki longkmie bala tip kyrteng kum ka Kanwal Sandhu kaba dei ruh ka Flight Lieutenant jong ka Indian Air Force kala ong ba kane ka dei ka sngi kyrpang jong ki longkmie bad kaba kyrpang ïaka hadien ba ka phong ïaka uniform ka long ba phin nym iohi shuh ïaka dur kynthei ne shynrang hynrei la iohi ïaki kum ki shipai da kaba ai mynsiem ruh ïaki paidbah khamtam ki khun samla ba kin pynïasoh ïalade bad ka Indian Air Force bad ai khublei ruh ïa baroh ki longkmie ïaka sngi kyrpang jong ki kaba suk bad kaba kmen.
