Plie ka Myntri ka Koit ka Khiah ïa ka Loomkyrwiang Urban PHC, kumba 22 hajar ngut kin myntoi

Jowai, Lber 08: Ka ophis jong ka District Medical Health Officer West Jaiñtia Hills Diatrict, mynta ka sngi Thohdieng 8 tarik u Lber, 2024 kala plie paidbah ïa ka jaka ai sumar kaba la tip kum ka Loomkyrwiang Urban Primary Health Center, Jowai.Ïa kane ka jaka sumar la wan ban plie da ka myntri ka koit ka khiah jong ka jylla ka Dr. Mazel Ampareen Lyngdoh, haka jingdonlang u MLA ka Jowai ma Wailadmiki Shylla, u Deputy Commissioner uba dei ruh u Chairman District Health Society ka WJHD bah B.S. Sohliya, ka DM&HO Dr. E.B.V Laloo, u President ka Kur Sookpoh Khadar Wyrnai uba dei ruh u Dolloi ka Elaka Jowai ma Puramon Kynjing, ki nongtrei jong ka UPHC nalor kiwei kiwei de.
La ïathuh ba kane ka Loomkyrwiang Urban Primary Health Center kala sdang treikam ban ai jingshakri ïa ki paidbah naduh u snem 2020, hynrei mynta ka sngi la wan ban plie paidbah ïa u Mawnongrim jong kane ka jaka ai jingsumar ba pura da ka myntri bad ka ïa katei ka jaka la ai sngewbha da ka Kur Sookpoh
Ka jingdon jong kane ka Urban Primary Health Center kala ïarap shibuh eh ïa ki paidbah kiba donkam ban leit shim dawai naduh ki khyllung khynnah, ki longkmie, ki longkpa bad ki samla kane ka Center ka lah ruh ban ai jingshakri ïa ki 12 tylli ki dong hajan ka sor Jowai.
Ka Dr. Mazel Ampareen Lyngdoh kum ka myntri ha ka jingkren kala ong kane ka dei ka sngi ba kyrpang kum ka nongmihkhmat kynthei ban ïoh plie ïa kane ka jaka sumar, haka juh ka por ka pynpaw ka jingsngewnguh ïa kane ka sorkar MDA 2.0 kaba la ibit ban bynshet haka ïa kane ka kam kum ka myntri jong ka koit ka khiah.
Kane ka jaka ai sumar ka long kaba donkam eh ha ka imlang ka sahlang na ka bynta ka koit ka khiah la ong ka kong Ampareen, da kaba ong ka jingtreikam kloi jong kane ka UPHC ka dei lyngba ka jingtrei shitom jong u MLA ka Jowai, kala kyntu kynjuh ïa u ban buddien ban thung ïa u MO ba pura jong ka Center.
Kala ong ka jingdon jong ka Center kan ai jingsumar kyrpang ïa ki longkmie haka kha ka pun, kan ïarap ïa ki longkmie ba kin don ha ka koit ka khiah, kumjuh ka ïarap ïa ka jingkoit jong ki khynnah bad ki khun samla ha ki liang baroh.
Kala buh ka jingkyntu ïa baroh ban long kiba ïatreilang haka imlang ka sahlang lyngba kane ka Center kan ïarap kynjuh ïa kiba pang HIV bad ban rat diengkhong ïa u Drug uba la kynrei mynta ki sngi. Kala ong ba ka sorkar mynta kala mang pisa khambuh ha kaba ïadei bad ka koit ka khiah bad kyrmen ba kane kan treikam pura hapoh ka jylla hi baroh kawei.
Na ka liang u MLA ma Wailadmiki Shylla ula ong hadien ba ka kong Ampareen Lyngdoh kala shimti kum ka myntri ka koit ka khiah ka District kala ïoh sa ar tylli ki Urban Primary Health Center kata ha Ïawmusiang bad ha Mihmyntdu nalor kaba la don lypa sa kawei ha Ladthadlaboh.
Hynrei dei tang kane ka Loomkyrwiang Urban Primary Health Center kaba don ïa ka ïing ba pura (Permanent) hapoh ka jylla hi baroh kawei. Shuh shuh ula ong ba kane ka Center kala ai jingsumar haduh 22 hajar ngut.
Ula pyntip ka sorkar kan ïaleh ban pynbha shuh shuh ïa kane ka Center namar wat na ka liang ka sorkar kala ju mang pisa haduh 11 hajar klur ha u snem 2018 hynrei mynta u snem kala poi sha ka 27 hajar klur tyngka.