Ka jingpynshai na ka DS Nonglang halor ka khubor ba ïa dei bad ka umbam umdih

Mawkyrwat, Lber 08 : Ka Dorbar Shnong Nonglang, South West Khasi Hills District ka don ban pynshai khyndiat halor ka khubor kaba la mih ha u ‘Highland Post’ ha ka 05 tarik u bnai Lber, 2024, kaba ong, “ba ka top um ba la dep plie da u Myntri ka tnad umbam umdih jong ka Jylla, u bah Renikton Lyngdoh Tongkhar, kam pat trei kam.
Shuh shuh kum ka Dorbar Shnong ka kwah ruh ban pynshai sha ki paidbah baroh ba katei ka top kaba don ha kawei na ki kyntoit lane dong jong ka shnong (Me-ïa-wan) ka lah treikam bad la ïa pyndonkam hi man ka por ïa ka um na katei ka top kaba dei ruh ka main supply ïa kiba bun tylli ki top barit bad bun ruh ki thliew ïing lah palat spah.
Hooid! ka dang don hi pat ka jingduna hangne hangtei khyndiat khynsoit namar ba ka dang don ka jingïapynbeit lang na ka liang ka ophis u Executive Engineer ka P.H.E jong ka Mawkyrwat Division ryngkat ka shnong ïa ki kam kiba dang sah, ong u Myntri.
Namarkata, na ka liang ka shnong ka kwah ban ong, lane bthah ïa kino kino ki briew napoh shnong lane ki nongshong shnong ba sngewbha lada ki don ei ei lane kynthoh ïa kino kino ki kam hapoh ka shnong, ba kin da ïa kynduh lane pyntip shwa ha ki nongkitkam shnong lane dong na ka bynta ka jingbhalang ka shnong ka thaw.
Kane ka long katkum ka kyrwoh khubor na u bah Firsterlin Kharraswai, Myntri Shnong Nonglang.