Shillong, Lber, 08: Ki shnong katto katne tylli kiba don hapoh ka Nongbah Shillong ki la pynpaw ïa ka jinglyngngoh bad bitar ruh ha kajuh ka por ïa ka jingbym mih um na ki kor ïing bad kumjuh ruh ki kor sorkar ri ha ka step sngi Thohdieng.
Kane ka jingbym sam um kynsan jong ka tnat PHE khlem da la ai ki jingpynbna paidbah ka la pynlong ïa ki nongshong shnong kiba lah dep ban buh pali ne ban pynïeng laiñ ïa la ki jong ki borti ne ki tiar rah um ha ki kor sorkar ri.
Kane ka jingsdang ban duna ka jingsam um sha katto katne ki shnong ka Nongbah Shillong ka la wanrah ka jingeh kaba khraw bha ïa ki nongshong shnong.
Napdeng ki katto katne ki nongshong shnong haba ïakren ki la pynpaw ïa ka jingsngew lyngngoh kaba jur naba kane ka jingmih um ka la ktah namarba ki khlem da la ïoh ban pynlang lypa ïa ka um naba kam shym la don ka jingpynbna ha ki lad pathai khubor halor kane ka jingpynduh um kaba kynsan.
Napdeng katto katne ki nongshong shnong haba kren biria ki la ong, “Imat kane ka jingpynduh um kynsan ka lah ban dei ba ki nongtrei ka PHE ki la shem jingeh na kadaw jong ka jingpyrkhing ka rukom pynïaid ïa ki kali sha Mawphlang na ka daw ba ka don ka Monolith Festival,” kren biria katto katne ki nongshong shnong.
Watla ka sorkar jylla ha ka dorbar mang tyngka kaba dang shudep na ka liang u Myntri ka tnat PHE u la kam ba ka jylla Meghalaya ka la long hakhmat eh na kiwei ki jylla kiba la lah ban pyntreikam bha ïa ka skhim ka sorkar Pdeng ka Jal Jeevan Mission hynrei da peit ïa ka jingtlot ka jingtrei kam ka tnat PHE haba ïadei bad ki rukom sam um ka la long da khongpong namar tang ïa ki shnong ha Nongbah Shillong ym pat lah ban sam um thikna kumno yn lah ban ngeit ba katei ka skhim ka la lah ban pynpoi um sha manla ki thliew ïing lyngba ki kor um ha ki Ïing jong ka skhim JJM.
