Shillong, Lber, 08: Ka Ratriya Bal Swasthya Karyakram (RBSK) National Health Misssion (NHM) ka Sorkar Meghalaya ha ka sngi Thohdieng ka la pynbna paidbah ïa ka National Birth Defect Awareness Month March 2024 ha Ganesh Das Government Maternal and Child Health Hospital, Shillong kum shi bynta ban pynshai sha ki paidbah nongshong shnong ka jylla ha kaba ïadei bad ka jingai jingsumar ei ïa ki khunlung kiba dang kha bad ïa ki khynnah kiba kynjoh ïa ka rta kaba 18 snem kiba don jingduna ha ki dkhotmet.
Ïa ki jingtip kiba bniah la batai bad ai jingpynshai da ka Dr. (Mrs) Susildaris Longtrai kaba dei ka Paediatrician, DEIC bad na u State RBSK Consultant, NHM, Meghalaya u Bah Johnson J. Nongbet.
Ha kane ka jingïalang, la sakhi lang da ka Addl. Superintendent jong ka Ganesh Das Government Maternal and Child Health Hospital, Shillong Dr. (Mrs) M. Syiemlieh, ka Social Worker, DEIC, East Khasi Hills ka Kong Euniky Lyngdoh, ka Director of Health Services (Maternal and Child Health & Family Welfare) cum Joint Mission Director NHM, Meghalaya ka Dr. (Mrs) F. Kharshiing bad kiwei kiwei.
Katkum ka jingai jingkheiñ jong ka RBSK, NHM, Meghalaya, ki khunlung ba dang shu kha kiba don ïa ki jingduna ha ki dkhotmet naduh u snem 2014 haduh u Rymphang, 2024 ki long 1916 ngut ki shynrang, 2191 ngut ki kynthei.
Kino kino ki kmie ki kpa kiba don ïa ki khun kiba la kha hapdeng ki jingduna ki dkhotmet ki lah ban leit sha ki jaka ai jingsumar kiba don ha ki shnong jong ki bad nangne yn sa phah ïa ki sha Ganesh Das Govt. MCH Hospital ka ban sa pyntip kumno ban ai jingsumar ïa ki khun jong ki.
