Shillong, Lber 08 : U Lamphang ka Ïing Dorbar Thawaiñ ka jylla, Thomas A Sangma ha ka sngi Thohdien gu la leit ban jurip ïa ka jingpyntrei ia ka Ïing Dorbar ba thymmai ha Mawdiangdiang bad ha kajuh ka por u la lum ruh ia ka jingialang buddien halor katei ka jingtei.
Ha ka jingïalang la donlang ruh naduh u Myntri Rangbah ka Jylla, Conrad K Sangma, nangta ki Symbud Myntri Rangbah, Bah Prestone Tynsong bad Bah Sniawbhalang Dhar, Myntri ka tnad Bording AT Mondal bad Myntri ka tnad PHE, Marcuise N Marak bad ki ophisar na ki tnad bapher bapher bad ruh ki kontraktor.
Na ka liang u Lamphang haba kren hadien ba la dep jurip bad shong ïa ka jingïalang buddien u la pynpaw ïa ka jingsngewhun ha ka jingïaid jong ka kam.
U pynpaw ruh ba ka thong ka long ban pyndep ïa katei ka jingtei ha ka por kaba biang khnang ba yn lah ban pynlong noh ïa ka Dorbar ha katei ka Ïing kaba thymmai.
Tangba u ong pat ba kaba kham kong san ka long ban trei sani khnang ba ka jingtrei kan long kaba skhem khlem da ïa peiñ bad ka jingshngaiñ.
U ong ruh ba watla ki beh ïa ka thong ban pyndep ha ka por kaba la buh hynrei kam don pat ka jingpynbor ïa u kontraktor bad kito kiba don bynta ha ka kam ban pynher ïa ka jingpyntreikam da kaba klet noh ïa ka jingshngaiñ.
Haba jubab halor ka jingkylli, u Lamphang u laong ruh ba u Myntri Rangbah kumjuh ki Symbud Myntri Rangbah ki la pynpaw lang ka jingsngewhun haba ïadei bad ka jingïaid jong ka kam.
Na ka liang u Lamphang u la pyntip ruh ba ïa ki tiar ba donkam na ka bynta ka main central hall la dep ban ioh bad kumta ki khmih lynti ba ka jingpyntrei kan long kaba ïaid beit.
