Jowai, Naiwieng 29: Ki ar tylli ki seng jong ki nongñiah kali kamai Shillong-Jowai, kiba kynthup ïa ka JSGTCA, Jowai ryngkat bad ka ITD&OA, Shillong hynne ka sngi 29.11.2023, hadien ka jingshong pyrkhat ban ïakren halor ka dor jong ka bai shong kali na Jowai-Shillong kumjuh ruh Shillong-Jowai, kane ka jingshong pyrkhat jong ki seng ka wan hadien ka jingsngewkhia ïa ka jingud jingnam jong ki paidbah na ka por sha ka por.
Mynta ka sngi ha ka jingïalang kaba la ïashim bynta lang da u ma A. Pohshna President JSGTCA, Jowai lem bad u D. Kharkongor President ITD&OA, Shillong ryngkat bad ki katto katne ki dkhot na ki ar seng, ha kaba hadien ka jingïakren bad pyrkhat sani bha na ki baroh ar liang, kumta da kawei ka sur ki ar seng ki la rai ban pynhiar ïa ka bai shong kali Shillong-Jowai bad Jowai Shillong na ka 250/- tyngka marwei sha ka 200/- tyngka marwei.
Shuh shuh la ong ruh ba ïa kane ka dor thymmai kaba long 200 tyngka marwei kan trei kam naduh ka 01.12.2023. Kumta ki nongïalam jong ki ar seng ki la buh ka jingkyrpad ïaki trai kali kumjuh ruh ïaki nongñiah kali kamai Shillong-Jowai, Jowai-Shillong, kiba don hapoh ka lama jong kine ki ar seng ban burom ïa kane ka rai bad ban ïatreilang khnang ba kano kano ka jingklumar kan nym mih hapdeng ki nongkamai kali bad ki nongshong kali kamai.
