Nongpoh, Naiwieng 29: Ka seng Khasi Student Union, North Khasi Hills District sa shisien pat kala tied biang ïaki skhor jong ka sorkar ban pynkynmaw biang sa shisien ba ka dei ban pyntreikam biang ïaka jaka pynlang umphñiang (Petroleum Storage Depot) kaba don ha Umiam, Ri-Bhoi District kaba la khang khyrdep bad sangeh treikam noh naduh u snem 2010.
Katei ka jingpynkynmaw biang ka KSU ban pyntreikam ïa katei ka jaka pynlang umphñiang ka dei hadien ka jingbyrngem jong ka North East Petroleum Mazdoor Union ban sangeh pynpoi umphñiang sha ka jylla ha kine ki khyndiat sngi hadien bala kynnoh ba kala don ka jingpyndik da ki pulit ka Meghalaya hadien ba kila pynlong ka jingkhynra naphang ïaki jaka bala don ka jingkhaïi beaiñ ïaka umphñiang ha ka thaiñ Ri-Bhoi District ba kum ka jylla Meghalaya hi mynta ka don hapdeng ka jingeh lada don ka jingsangeh ban pynpoi umphñiang da ka Mazdoor Union.
Kum ban shu pynkynmaw ba naka liang ka seng KSU ha u snem 2015 kala dep ruh ban buh jingthoh teng sha ka Deputy Commissioner ka Ri-Bhoi District halor katei ka bynta ban pyntreikam biang ïa katei ka jaka pynlang umphñiang ha Umiam ba ka jylla jong ngi kan nym kyrduh umphñiang bad katei kan long ka jingkyrkhu ïaka jylla Meghalaya ba kam da donkam ban da khuslai than lada don ka jingïakhih hapoh 2 bnai.
Bad mynta ka sngi naka liang ka KSU sa shisien kala leit ban buh biang da ka jingthoh sha u Deputy Commissioner ka Ri-Bhoi District ban pynkynmaw biang ba ka sorkar ka dei ban shimkhia ban pyntreikam biang ïa katei ka jaka pynlang umphñiang ha Umiam bad naka liang ka seng kala ioh ban ïakynduh ïa u Raja Brahma ADC ka Ri-Bhoi hadien ba u DC um don ha katei ka sngi.
Haba kren sha ki lad pathai khubor hadien ka jingïakynduh bad u ADC ka Ri-Bhoi u Samla Ferdynald Kharkhamni President ka KSU NKHD u la ïathuh ba ka jingwan jong ki ban kynduh ïa ki bor pynïaid District ka long ban pynkynmaw ïaka jingdawa jong ki lyngba ka dorkhas kaba ka seng ka ladep ban ai ha u Deputy Commissioner ha u snem 2015 ban kyrpad naki bor district ban pyntreikam biang ïaka jaka buh umphñiang lane ka Petroleum Depot kaba don ha Umïam khnang ba lada don kano kano ka jingïakhih naka liang ka Assam hakaba ïadei bad ka umphniang kan nym don jingktah ïa ka jylla jong ngi.
U samla Ferdynald Kharkmani u la ïathuh ba ïa katei ka jaka ban buh umphniang lane ka Petroleum Depot la aiti sha ka Assam Oil Division of Indian Oil Corporation naduh ki snem 1992/93 da ka jingmynjur lang ruh ka sorkar, ki trai jaka, da ka jingthmu ba katei ka jaka kan long kum ka jaka pynlang umphñiang ba ka jylla kan nym don jingktah lada don ka jingïakhih ha ka jylla Assam kumba ka jylla mynta ka shañiah tang na surok ïaka lynti ban pynpoi umphñiang bad lada don ka jingïakhih ha ka jylla Assam ka jylla Meghalaya kan mad jingeh.
U la ong ruh ba tang namar ki Mazdoor Union ki byrngem ban sangeh pynpoi petrol shaka jylla bad naka liang u myntri jong ka sorkar jylla u hap ban ïa kynduh ïaki bad kane ka long kaei kaei kaba bakla, bad u la ong ruh ba naka liang ka seng ka kyntu ïaka ka sorkar ba kan nym shimkhia ïa kum kine ki jingbyrngem hynrei ka la dei ban shimkhia noh ïa kaei ka jingdawa jong ka seng ba ka la buh naduh u snem 2015 ban pynurlong ïaka Petroleum Depot khnang ba kan pynsuk ïa u paidbah jong ka jylla lada don kum kine ki jingpynsangeh ban pynpoi ïaka umphñiang shapoh ka jylla Meghalaya namar dei satang ka jylla Meghalaya ka bym pat don jaka pynlang umphñiang bad kala dei ka por kaba donkam eh ïaka sorkar jylla ba kan shimkhia ban pynurlong ïa katei ka jingdawa ym ban shu shañiah nabar jylla nalor ka jingrem ka petrol naka bynta ka jingbit jingbiang jong ki paidbah ka jylla hi baroh kawei.
Namarkata naka liang ka seng kala kyrpad ïaka bor district bad khamtam ka sorkar jylla ba ka dei ban shimkhia ban pynsted ban pynurlong ïaka jingpyntreikam biang ïa katei ka jaka pynlang umphñiang ha Umiam ban pynkhreh lypa ïaki jingeh ba ka jylla ka lah ban mad biang hadien habud, u la bynrap.
