Nongpoh, KyllaLyngkot 05: Ka seng HITO, Ri-Bhoi District hapoh ka jingïalam jong u Bah Apbor Nongrum mynta ka sngi kila hiar sha ka shnong Mawbri Ri-Bhoi District ban khynra ïaki bar jylla kiba dei ki nongtrei jong kawei ka kompani IGGL bad ha katei ka jingkhynra naka liang ka seng kala lap ba kitei ki bar jylla kim don ïaki kot ki sla kiba biang naduh ki labour license bad kiwei kiwei ki kot ki sla.
Hadien ka jingtalasi jong ka seng ïaki kot ki sla, bad lap ba kim lah ban pynbiang naka liang ka seng bad wat u rangbah shnong um don jingtip halor ka jingwan kitei ki bar jylla, ha kaba naka liang ka seng kala pynher krad syndon bad phah song biang ïaki jaiñ ki nep ba kin leit phai biang sha ki shnong jong ki.
Naka liang u Bah Apbor Nongrum u la ong ba kum ka seng ka dap da ka jingsngewkhia halor ka jingwan rung kyrthlep jong ki mynder naka por shaka por, khlem ka jingtip jong ki bor shnong bad khlem ki kot ki sla kiba biang watla ki wan ban bylla, bad haka juh ka por ka seng ka kyrpad sha ki paidbah ba kim dei ban ai wai kulmar ïaki bar jylla bad maham ruh ïa katei ka kompani ba kam dei ban wanrah kulmar ïaki briew khlem da pynbiang shuwa ïaki kot ki sla shuwa ba kin rung shaka jylla.
