Da ki hajar ngut kiba wan sha ka jingïalang ki 13 shnong jong u ma Nehemayah Tyngkan

Jowai K’Lyngkot 05: Ka Election Committee jong u ma Nehemayah Tyngkan, mynta ka sngi kala pynlong ïa ka Dorbar 13 shnong naka bynta ka kam Elekshon jong u kaba la long ha Madan Phutbol Mooblang, Iooksi Iapkhla West Jaiñtia Hills District.
Ha kane ka sngi da ki hajar ngut ki paidbah kiba poi sha ka jingïalang kum ka dak ban ai jingkyrshah ia u ma Nehemayah Tyngkan ban ïakhun ia ka Election MLA na ka 4-Mowkaiaw Constituency kum u kyrtong na ka party Congress.
U ma Nehimaya Tyngkan kum u kyrtong jong ka Party Indian National Congress (INC) mynta ka sngi haba kren ha ka jingïalang paidbah jong ki 13 shnong kaba la pynlong ha shnong Iooksi, ula pynpaw ïa ka jingsngewskhem ba un poi beit sha ka thong ha kane ka kynti.
U ma Nehimaya haba kren sha ki hajar ki nongkyrshan jong u kiba la poi sha kane ka jingïalang ula ong “Ym dei shuh ban ong lada ngan jop, hynrei ngan jop beit. Ka jingjop jong nga kan pynlong ïa nga ban ïoh ïarap ïa kiba bun ki kup shiliang ki sem shiliang lane kiba duk ba kyrduh, khamtam ïa kito ki long ïing kiba don ïa ki dkhot jong ka ïing kiba don jingduna ne kiba anna”.
Ula khot ïa ki nongshong shnong jong ka thaiñ 13 shnong ba kim dei satia ban beh ia kiba her bad ieh ia kiba dem. U ong ba ma u hi, u dei u trai shnong jong kane ka thaiñ bad ka iap ka im jong u ka long beit sha kine hi ki thaiñ.
U Tyngkan u pynshai ruh sha ki paidbah da kaba ong ba ka Congress kam pat la duh jait hapoh ka Jylla Meghalaya, namar don katto katne kiba kren sharum shaneng ba ka Party Congress kam don shuh. Ula ong ba ki don tang katto katne kiba long ki khwan myntoi shimet bad ki bym skhem nongrim kiba la mih noh na ka seng Congress bad leit pyniasoh sha kiwei pat ki Party.
Na ka liang jong u ma Nehemayah ula khot bad kyntu jur ïala ki nongkyrshan ba ki dei ban kiar na ka jingshah thong ha ki bor jong ka pisa. Ula ong ba bun na ki nongïalam jong u kila shah thong pisa ban iehnoh ïa u bad ïa ka Party, hynrei kim shym la ngop ha kane ka jingshah pynbeit sbai.
Ha kajuh ka por ula ong ba ïa u hi shimet ruh kila don kiba wan thong pisa haduh 5-7 klur tyngka, hynrei ula ong ba um hun tang ban ioh iatei ka pisa bad ban shong aram ïalade da kaba klet pat ïa ki paidbah nongshong shnong kane ka thaiñ kiba don hapdeng ka jingeh bad jingïaleh ha kiba bun ki liang.
Ïa ka jingïalang la pynïaid da u ma C. Tangliang uba la ai ruh ki kyntien pdiang sngewbha ïa baroh ki nongwan sha ka jingïalang, kiwei de kiba ai jingkren ki kynthup ïa u samla Ribok Biam, u ma Yul Sungoh Ex President UDP 13 Saphai, ma Rikut Parien President ka BCC, ma Wanpoi Lyngdoh, bah Pynshngain N Syiem ka Meghalaya Pradesh Congress Committee (MPCC), nalor kiwei kiwei de.
Baroh kitei ki nongkren kila ai ïa ki kyntien kitbok kitrwiang ïa u ma Nehemaya Tyngkan ba ha kane ka kynti jong ka Election MLA 2023 un poi sha ka thong ka jingjop lyngba ka jingieit jong ki paidbah nongshong shnong ka 4 Mowkaiaw Constituency. La pynshong shit shuh shuh ïa kane ka jingïada da ki jingshad na ki longkmie bad ki khun samla ka thaiñ.