10 tylli ki kor computer aiti u MLA sha ka skul St Joseph Umden, aiti ïaka iing Seng kynthei jong ka Balang Diwon

0

Nongpoh, Kyllalyngkot 05: Kum ka jingbteng ban sam ïaki kam pynroi ha Nongpoh Constituency khamtam ban dang kyntiew ïaka pule ka puthi ki khynnah skul, u MLA ka Nongpoh u Bah Mayral Born Syiem mynta ka sngi u la leit ban aiti ïaka work order sha ka skul St. Joseph Higher Secondary School, Umden naka bynta ban thied 10 tylli ki kor computer bala pynmang haka jinglut kumba 3 lakh tyngka lyngba ka skhim SRWP jong u snem 2022-23.
Ha katei ka juh ka sngi naka liang u Bah Mayral Born Syiem u la leit ruh ban plie paidbah ïaka ïing kynthei jong ka Balang Presbyterian Diwon, ïa kaba la tei haka jinglut bala poi kumba 20 lakh lyngba shibun ki nongnoh synñiang bad leit ruh ban shim bynta haka jinglehkmen snem thymmai jong ka Lamlynti VO haka shnong Diwon.
La sakhi ruh ha katei ka sngi da ka jingdonlang u Bah Balajied Ranee MDC, Fr. Glorius Syiem Parish Priest ka Umden Parish, ki longkmie ki longkpa, ki nonghikai bad ki khynnah skul jong ka St. Joseph Hr Secondary School, Umden.
Haba kren ha katei ka sngi naka liang u Bah Mayral Born Syiem u la pynpaw ka jingsngewkmen kaba khraw bala lah ban aiti ïaka work order naka bynta ban thied ïaki kor computer kaba dei ruh shibynta ka jingdonkam jong ki skul pule ha kane ka juk ba mynta, kumjuh ruh ban aiti ïaka iing kynthei jong ka Balang Presbyterian Diwon kaba long ka jingkyrkhu ba kin lah ban treikam bad ban bteng ïaka jingshakri ban pyntyllun ïaki kam jong ka Balang.
U la ong ba kum u MLA u la pyrshang ban wanrah shibun ki kam pynroi naduh ba u la shimti ïaka kam nongïalam bad lyngba ka jingïatreilang bad ki longkmie longkpa, ki nongïalam shnong bad nongïalam balang yn dang lah ban bteng shuh shuh ban wanrah ki kam pynroi naka bynta ka jingdonkam haki shnong bapher bapher ha Nongpoh Constieuncy.

Leave A Reply

Your email address will not be published.