Lada ki ïa kynduh hangno hangno sa ïa kren ym da ka ktien ‘Sohra’ hynrei da ka ktien ‘Maram’: Fr. Alistar Marweiñ

0

Mawkyrwat, K’lyngkot 05: Ka Parish Nativity of Our Lord kum shi bynta jong ka jingrakhe ïa ka jubili ksiar, ha ka 31 tarik jong u bnai Nohprah, 2022 ka la lum kyrpang ïa ki riew niam na ki jingïasyllok bapher bapher kiba dei na kane ka Parish.
Ïa kane ka sngi ba kyrpang la sdang da ka mass bakhuid ha kaba u Phadar ba nyngkong jong ka parish u Fr. Pascal Lyngdoh u la long u nongkñia ba rangbah ha ka jingïadonlang jong ki phew ngut ki phadar kiba dei na ka parish kiba la trei ha bynta bapher bapher jong ka jylla, ka ri bad ha ka pyrthei baroh kawei.
Haba pharia ïa ka ktien U Blei u Fr. John Lyngdoh, OFM u la ong kum ki riew niam kane ka dei ka sien ba nyngkong ba ki ïoh kane ka lad ban ïa don bynta lang baroh ki riew niam kiba dei na ka Parish bad da kane ki la lah ban ithuh iwei ïa iwei pat.
“Kane ka sngi ka dei ka sngi ba kyrpang na ka bynta jong baroh, bad kine baroh ka dei ka jingstad jong u Parish Priest u Fr. V. Friding Kharsyiemiong uba la sdang bad pynurlong ban lum ïa baroh ki riewniam kynthei bad shynrang kiba dei na kane ka Parish,” u la ong.
U la bynrap ruh da kaba ong, “Kum ki riew niam ka dei ka bynta ka jong ki ban pynsngewthuh ïa ki paidbah na ki nongïalam bakla kiba pyrshang ban ïalam bakla ïa ki paidbah”. “Ki don ki briew kiba ïalam bakla kiba ïaid sawdong ban ïalam bakla da kaba ong ba kin die noh ïa baroh ki mar ki mata bad, ki jingri jingdup bad baroh kaba ki don”, u la ong. Kane ka la ktah shibun bad ka la pynlong ïa kine ki briew ba kin die bad shong sha khlaw namar ki ngeit ba da kaba sah sha jngai na kiwei pat kin lait na ka pop bad na kiwei ki kam sniew, bad U Jisu Un sa rah noh ïa ki sha katta ka jaka kaba ki ngeit ba kin don lang bad ki.
Ha kane ka sngi, hadien ka Mass Bakhuid, ka la don ka prokram ba kyrpang ban pynkup burom ïa ki riew niam na kane ka parish kiba wan ban ïashimbynta bad kito ki bym shym la lah ban wan ïashimbynta lang.
U Fr. Alistar Marweiñ haba kren ha kane ka sngi, u la ong ka Parish Nativity of Our Lord ka la pynmih shibun ki riew niam kiba bat ïa ki kyrdan bapher bapher bad kiba trei sha baroh ki bynta. “Bun ki riew niam kiba na kane Parish ki trei ha ki jaka bapher bapher, ha ka ri bad ha ka pyrthei baroh ka wei”, u la ong.
U la bynrap da kaba ong, “Ki briew jong ngi ki trei ha ki kam Balang ha ki kyrdan bapher bapher, bad kat sha ba ngi leit ngi ïa kynduh beit ïa ki briew jong ka dong ka thaiñ”. Kumta u la ong ruh ba lada ki ïa kynduh hangno hangno sa ïa kren ym da ka ktien ‘Sohra’ hynrei da ka ktien ‘Maram’, bad ngi dei ban sngewsarong ba ngi dei na kane ka thaiñ.
Ha kane ka sngi la pynshongshit shuh shuh da ki jingshad ki jingrwai bad kiwei kiwei ki jingpynbyrngia.

Leave A Reply

Your email address will not be published.