Pynher doskhas u samla Kynjaimon Amse sha ka MHA halor ki jing shah thombor ha khappud ba suba ba thombor da ki nong Bangladesh

Khliehriat kyllalyngkot 14: U samla Kynjaimon Amse, uba dei u muktiar, uba na ka shnong Umkiang East Jaiñtia Hills District, myn ha ka 10 tarik mynta u bnai u la phah da ka dorkhas sha ka tnat Ministry of Home Affairs bad pyntip halor ka jingjia shah pyniap uwei u riew rangbah ha Balisar ha shnong Lumskie, ka jaka ba khappud bad ka ri Bangladesh kaba la jia myn ha ka 6 tarik mynta u bnai.
Katkum ka dorkhas, la ong ba ki la don kumba 15 haduh 16 ngut kiba riew kiba wan na Bangladesh kiba la wan rung beaiñ sha u pud u sam ka ri India na katei ka jaka na East Jaiñtia Hills District, kiba don ka jingthmu ban wan tuh ïa ki kwai bad ynda ki la iakynduh ïa u bah Rahul Pohtam bad u (L.) Sylvanus Dhar kiba dei ki nong India kiba na ka thaiñ khappud, kitei ki nong Bangladesh ki la thombor da ki wait ba ki la rah, kitei ki ar ngut pat kiba dei ki nong India ki la pyrshang ban ïada ialade hynrei kim lah kumta ki la phet krad noh, ha kane ka jingphet krad kitei ki nong Bangladesh kiba da ka kynhun ki la ioh bat ïa u (L) Sylvanus Dhar bad ki la pom ïa u da ka wait, ki la ot na ryndang, na khmat haduh ba un da khlad.
U bah Kynjaimon, u la bynrap ruh da kaba ong ba mynta la bun snem kane ka jingwan rung tuh ki briew kiba na ri Bangladesh ka jur bha kiba wan ban rong tuh ïa ki mar rep jong ki paidbah kiba ha ki jaka ba khappud bad ka ri Bangladesh kaba la wanrah ka jingduhnong kaba khraw ïa kito ki nongrep kiba don ki bri kwai bad ki jaka rep ha ki jaka ba jan bad ka jaka ba ker pud da ki sainar ha khappud, ki briew ka thaiñ kiba dei ki nong India, kiba don jaka rep ha ki jaka ba marjan bad ka Bangladesh kim banse ban hap ban sahmiet ha khlaw kaba dei ka jaka rep jong ki ban iada ban lait na kane ka jingshah tuh ha ki briew kiba ju wan na Bangladesh.
La ong ruh ba ki shipai Border Security Force kiba la buh ban pahara ha katei ka thaiñ ruh kim shym la lah satia ban tehlakam ïa kane ka jingwan rung tuh ki briew kiba na ri Bangladesh kiba ju wan rung beaiñ shane sha ri India.
” ym lah ban len ba ki shipai BSF bad ka long kaba shisha ruh ba ïa ki shipai la thung ïa ki ban tehlakam ïa ka jingwna rung tuh ki briew kiba na bar ri, hynrei watla katta ruh ka dang don kane ka jingwan rung tuh ki nong Bangladsh, khlem artatien lah ban don ruh ka jingiakhaïi tuh ha khappud ha kaba lehse ki briew kiba dei ki nong India ruh ki lah ban donkti lang.
Ka jingwan rung beaiñ ki nong Bangladesh ka ju jia na kiba bun ki jaka ha khappud kum na shnong Lumsoskie, Umkiang, Dona Skur bad na Ratachera, East Jaiñtia Hills District bad ka ju don ruh ka jingshah tuh ha kine ki jaka ha khappud, halor kane u samla Kynjaimon Amse, u buh ïa kane kum ka jingkylli ha kaba ka tnat Border Security Force ka dei ban jubab.
“Ki shipai BSF ha ka jaka ban shim khia ban tehlakam ïa ka jingwan rung tuh ha khappud ban ïada ïa ki paidbah hynrei ki wan ieng pahara pynban ha surok national highway 6 ha East Jaiñtia Hills Disrict ban tehlakam ïa ka jingiakhaiï tuh ha khappud ”
U la kynthoh ruh ba ka tnat shipai BSF kam shym la lah ban tehlakam ïa ki kam sniew ha khappud bad kane ka buh jingma bad jingsyier ïa ki paidbah ka thaiñ, katei ka jingjia shah thombor bad shah pyniap ha khappud kam dei ka sien ba nyngkong ba ki wan rung tuh ki briew na Bangladesh, hynrei myn ha ka 12 u nailur 2023 ruh kawei ka longkmie ka (L) Priskila Suchiang, kaba na ka shnong Donaskur ka la shah pyniap dusmon ha ki briew ba suba ba ki dei ki nong Bangladesh namar ki tang shu dep pyniap ki phet krad sha Bangladesh watla ka jaka ka dei kaba la pahara da ki shipai BSF.
La ong ruh ba hadien kine ki jingjia shah pyniap kiba la jia ha ki jaka ba khappud, ki paidbah kiba don ha ki jaka khappud ki la dap da ka jingtieng bad jingsyier, u bah Kynjaimon u kyntu ïa ki bor shipai jong ka tnat BSF ba ki dei ban shimkhia ba ki jaka ha khappud kin long kiba shngaiñ ïa ki paidbah “Nga sngewtuh ba ka long kaba donkam ban tehlakam ïa ki kam khaïi tuh ha khappud hynrei ha kajuh ka por ka donkam ruh ban tehlakam ïa ka jingwan rung tuh ki briew sha u pud u sam jong ka ri India bad ruh ban pynjur ka jingpahara bad ruh ban buh bun ki ktem pahara ha ki jaka ha khappud.