Mawkyrwat, K’lyngkot 14: Ka Hynñiewtrep Integrated Territorial Organisation (HITO) jong ka South West Khasi Hills District da ka jingsngewkhia ki la leit ïa kynduh ïa u Deputy Commissioner jong ka South West Khasi Hills District, u bah T. Lyngwa, IAS ban kyrpad ban pyllait noh ïa ka Result jong ka District Selection Committee (DSC) hadien ka jingud jingnam jong ki khun samla wad kam na South West Khasi Hills halor ka jingslem ka result jong ka DSC naduh u snem 2022 ha kaba haduh mynta u snem 2023 kim pat ïoh ïa ka Result jong ki.
Ïa ka jingleit ban ïa kynduh ka dei hapoh ka jingïalam u bah Paul Thyrniang, President bad u bah H.M. Ramsiej, General Secretary ha ryngkat bad kiwei de ki dkhot jong ka seng.
Hadien ka jingleit ïa kynduh, ka la don ruh ka Press Conference ha kaba na ka liang jong ki ki la ong ba u DC u la ïathuh ba dei namar ka jingpynslem jong ki tnad ophis bapher bapher kiba don hapoh ka distrik ka sa slem ka jingpynmih. Namarkata, ka seng ka la kyrpad ïa ki tnad ophis bapher bapher kiba don hapoh ka South West Khasi Hills District ki dei ban pynkhreh lypa namar na ka liang seng ha kano kano ka por kan sa leit wad bniah na ka bynta kine ki (Vacancy Post) ki kam kiba thylli ha ki ophis sorkar.
Shuh shuh ki la buh ruh ka jingmaham ïa ki ophisar ha baroh ki tnad ophis hapoh ka distrik ba kin sangeh shwa ban thung-kam tad haduh ban da pyllait shwa ïa ka Result jong ka DSC khnang ba ki khun samla wad kam napoh ka South West Khasi Hills District kin ym sah ka jinglynngoh bad ka khyrwoh na ka liang ka seng ba na ka liang ki ophisar bad ki bor distrik kin nang pynsahteng shwa bad lada kim leh kumta ka seng kam banse ba kan hap ban shim da kiwei ki synjam ban khot ïa ki samla wad kam ban pynlong da ka jingïakhih, ong u bah Paul Thyrniang, President HITO jong ka South West Khasi Hills District.
