Shillong, Lber 31 : U Bah Process T Sawkmie, MLA barim ka Mawlai kum u kongsan u la pynhap pyrda ïa ka skul sport bashisien shisnem kaba la tip kum ka Annual Sports Meet 2023 jong ka Sacred Heart Boys Higher Secondary School, Mawlai kaba la pynlong ha madan Law Roman hynne ka 31 tarik bad kaba la sdang hynnin ka 30 tarik u Lber 2923.
Haba kren kum u kongsan u bah Sawkmie u la pynpaw ïa ka jingsngewnguh ïa u Father Principal Alister Marweiñ na ka bynta kane ka jingkhot sngewbha jong u.
“Bun ki lah ban buh jingkylli balei ki khot ïa u Bah PT Sawkmie u bym dei shuh u MLA, hynrei nga ai khublei ïa u Principal bad ki nonghikai kiba la khot sngewbha ïa nga,” ong u Bah Sawkmie.
U la bynrap, “Khublei shibun ba phi kynmaw bad ka burom kaba phi ai ïa nga ha kane ka sngi.” U la kyrpad ruh ïa ki khynnah skul ba kin shim bynta ha ki prokram ba ka skul ka pynlong khnang kin lah ban kyntiew ïa ki sap ki phong ba ki don.
Hashuwa kane u Father Alister Marweiñ, Principal jong ka Sacred Heart Boys HSS, u la ai khublei kyrpang ïa Bah PT Sawkmie ba la pdiang sngewbha ban long kum u kongsan bad kum ka skul ki dang da ka jingsngewkmen haba ïadei bad kane.
“Balei ngi khot ïa u briew bym don shuh ha ka shuki, namarba ngi ngim don kum kata ka rukom pyrkhat, ngi ai khublei ïa ka jingnoh synñiang jong i iba ju ai bad iba kloi ruh ban ai khlem da donkam ban pan.”
Ha kane ka skul Sports ki don ki jingïamareh 100, 200 400 mitar, ka javelin throw, shot put, ki Relay na ka bynta ki shynrang bad kynthei bad kiwei kiwei kiba la pynshongshit ïa ki khynnah.
Ha kane ka sngi kut la ïoh ruh ïa ka dril na ki khynnah klass 6 bad 7.
Ha ka jingïakob inter house, ka Yellow House ka la ïohrah ïa ka trophy kum ka Champion ha ka jingïalehkai sports, ka Green House ka la ïohrah ïa ka nam Most Discipline team, katba ka Yellow House ka la wan nyngkong ha ka March Pass bad ka Green House ka la wan baar.
Ha kane ka sngi la sam ruh ïa ki khusnam shimet, ha kaba u Pynshngaiñlang Marngar u la ïoh khur ia ka nam best athlete ha ka under-14, hadien ba u la ïoh khur ar tylli ki takma ksiar bad kawei ka takma rupa, u Lawanrikupar Kharmujai u la ïa ka nam Best Athlete ha ka Under-16, une ruh u la ïoh khur ar tylli ki takma ksiar bad kawei ka takma rupa, ha ka Under-18 ïa ka nam Best Athlete la ïohrah da u Aiboklang Nongrum, Ar tylli ki takma ksiar bad kawei ka takma rupa bad ha ka Under-18 jong ki kynthei ka Shaihun Rongsin bad ka Balasiewdor Pathaw ki la ïoh khur ïa ka nam Best Athlete, hadien ba ki la ïoh khur mar lai tylli ki takma ksiar.
