Shillong, Lber 31 : Ka Meghalaya Sport Climbing and Mountaineering Association (MeSCMA) ka pynpaw ka jingsngew sarong ban pynbna ba u Teimiki Sungoh na ka shnong Shangpung, West Jaintia Hills u la shah jied ha ka Association ban leit pyntbit ha ka kam kiew lum (Advance Mountaineering Course) ha Himalayan Mountaineering Institute (HMI), ha Darjeeling.
Katei ka lynnong ai jinghikai kiew lum kan sdang naduh ka 1 tarik haduh ka 28 tarik u Ïaïong 2023, ïa kaba la kyrshan pisa ïa u Bah Teimiki Sungoh lyngba ka Directorate of Sports and Youth Affairs jong ka Sorkar Jylla.
U Bah Sungoh u la pyndep ïa ka Basic Mountaineering Course na ka National Institute of Mountaineering bad Allied Sports (NIMAS), Arunachal Pradesh da kaba ïoh ka kyrdan Grade “A” kaba dei ka kyrdan kaba heh tam ha katei ka jingai jinghikai kiew lum.
Ki kyndon na ka bynta ban ïoh ïashim bynta ha katei ka jingkiew lum kadei ba ki nongkiew lum ki dei ban don ka bor met bad bor pyrkhat kaba khlaiñ bad ban long kiba shlur.
Kane ka long katkum ka kyrwoh khubor na ka Kong Malviancy Shabong kaba dei ka President jong ka MeSCMA.
