Nongstoiñ, Nailur 17: Ka Langumshing A Sport Club Knock Out Tournament ha ka sngi saitjaiñ jong ka taïew ka la ïoh ban khang pyrda noh ïa ka lympung jingïalehkai Football ïa kaba la pynlong ha madan shnong.
Ïa katei ka lympung la wan ban khang pyrda noh da u bah Methodius Dkhar MLA ka Mawshynrut konstitwensi kum kongsan ryngkat u bah Arkhelius K. Diengngan Secretary ka Mawshynrut Sport Association kum u symbud kongsan, ha kaba la ïadonlang ruh u bah S.Nongsiang president ka Langumshing A Sport Club, u bah E.Nongsiang sordar shnong ka Langumshing A bad kiwei kiwei ki riew rangbah jong ka thaiñ.
Ha katei ka sngi ka LangumshingA Sport Club ryngkat ka jingïasnohktilang bad ka Riangdo Youth Sport Social and Cultural Association, ka la ïoh ruh ban pynkup burom ruh ïa ki ar ngut ki heprit kiba la wan ban ïashimbynta ban ïalehkai sha ka lympung AIFF sub junior National Football Championship ban mihkhmat ïa ka jylla Meghalaya sha Punjab kaba dang shu dep shen.
Ka jingpynkup burom ka long kum shibynta ka jingai mynsiem bad ban sngew sarong namar ki dei kiba na katei ka thaiñ Mawshynrut bad kitei ki heprit ki kynthup ïa ka Wanrishisha Khoksi bad ka Julita Langrin.
Ha katei ka sngi ki don haduh 4 tylli ki kynhun kynjat bol kiba la poi sha ka final, ba kynthup ïa ka LASC pyrshah ïa ka Lower Langumshing na ki shynrang katba na ki kynthei pat ka Nonglang NASCFC pyrshah ïa ka Kyllonmathei Women.
Ïa ka namjop la khur da ka Nonglang NASCFC da 1 la 0 na ki kynthei, katba na ki shynrang pat dei ka Lower Langumshing kaba la khyrwit haduh 3 la 1 bad ïoh ruh ban rah shi syndon ïa ka nam jop.
Na ki kynthei ka Utiful Sohbar ka la ïoh ïa ka nam kum ka nongïalehkai ba tbit tam, ka Grace Marthong kum ka nongthep bun tylli ki kol bad ka Kmen Lyngkhoi kum ka nongap kol ba tbit tam. Haba phai na ki shynrang pat u Phrikstar Nongbak u la ïoh ïa ka nam kum u nongïalehkai ba tbit tam, u Pynshai Kharsyiemlieh kum u nongap kol ba triem bad u Tylliborsingh Shangdiar kum u nongthep kol bun tylli.
