Ïoh jingmyntoi ki samla pule ha ka Youth Festival ba ar sngi ha ka shnong Mawkyrwat
Mawkyrwat, ‘Nailur, 17: Ka Sngap Syiem College, Mawkyrwat, South WKhasi Hills District ha ka jing-i-phuh i-phieng ki la ïoh ban pynkut noh ïa kane ka Youth Festival 2023 kaba 2 sngi ha kaba u bah Renikton Lyngdoh Tongkhar, MLA ka Mawkyrwat Constituency u la long kum u kongsan.
Ïa kane ka Youth Festival ba ar sngi ba la pynlong da ka Sngap Syiem College, Mawkyrwat ha ryngkat da ka jingïatreilang bad ka Meghalaya Aids Control Society, Shillong halor ka phang, “Kmen katba phi dang im, Tehlakam, pynduh ïa ka HIV/Aids” ha Sngap Syiem College, Mawkyrwat, South West Khasi Hills District bad kiba la wan ïa shimbynta ki long da ki samla pule jong ka Nongstoiñ College, Nongstoiñ, West Khasi Hills Distrik ka St. Xavior College, Umoid bad ka Sngap Syiem College Mawkyrwat.
Haba kren ha ka jingïalang, u bah Renikton L. Tongkhar u la ai ka jingïaroh ïa kane ka Sngap Syiem College ba ka dei ka kolej kaba la pyntrei kam ïa ka National Education Policy (NEP) kane ka sa long ka jingmyntoi ïa ki samla pule ha kane ka thaiñ bad ruh u la kyntu ruh ïa ki samla pule ba kim dei ban pynlehnoh ei ïa kaei ba ki la ïoh jinghikai ha kine ki ar sngi lyngba ka Meghalaya Aids Control Society. Ha kane ka Youth Festival 2023 la ïoh ruh ban pynlong ïa ka Quiz Competition, Skit Competition bad ruh ka jingïamareh thong kaba 5 kms.
Ha ka jingïamareh thong na liang ki shynrang la ïoh rah nyngkong da ka Sngap Syiem College, Mawkyrwat lyngba u Wolbestar Ramsiej bad na ka liang ki Kynthei la ïoh rah nyngkong da ka St. Xavier College, Umoid da ka Daplin Wahlang.
Na ka bynta ka Skit Competition ka St. Xavier College Umoid ka la ïoh ha ka kyrdan ba nyngkong bad ha ha ka kyrdan ba ar bad ba lai pat la ïoh da ka Sngap Syiem College, Mawkyrwat
Na ka bynta ka Quiz Competition na ka bynta ki Degree Level ka St. Xavier College, Umoid ka la ïoh ha ka kyrdan ba nyngkong bad ka Sngap Syiem College, Mawkyrwat ka la ïoh ha ka kyrdan ba ar bad ba lai, kumjuh ruh na bynta ha kyrdan Higher Secondary Level, la ïoh rah da ka St. Xavier College, Umoid bad ha ka kyrdan kaba ar la ïoh da ka Modern Accademy Secondary School, Rangmaw bad ha ka kyrdan kaba lai la ïoh da ka Presbyterian Higher Secondary School Maw-langwir. Ha kaba kut kane ka Youth Festival 2023 nalor u kongsan la ïoh ruh ka jingkren na ka kong Latina Nongpyiur, Assistance Director Youths, MACs, u Dr. K.K. Nongsiej, Principal Sngap Syiem College, Mawkyrwat ha ka jingïadonlang u bah Ajoy M. Lanong, Deputy Director MACs ki Nonghikai ki samla pule bad kiwei.