Pynbna u Myntri Rangbah T. 15 klur ban buh ïa ka Indigenous Cultural Centre ha Mawkhar

Shillong, Iaiong 07: U Myntri Rangbah ka jylla u Conrad K Sangma ha ka sngi Nyngkong u la pynbna ba ka sorkar ka la mang T. 15 klur na ka bynta ban buh ïa ka Indigenous Cultural Centre ha Mawkhar.
Haba ïakren bad ki lad pathai khubor ha ka jinglehniam Shad Suk Mynsiem, u Sangma u la ong, “Kumba ngi la ju ong ba ngi donkam ban pynneh pynsah ïa ki riti dustur bad ki kolshor bad ka jingdonkam ban kyntiew ïa ki kumta ka donkam ban don ïa ka Indigenous Cultural Centre. Halor kane na ka liang ka sorkar ka la mang kumba T. 15 klur na ka bynta kane ka kam.”
“Ha u bnai ban wan ngi dei ban buh ïa u mawnongrim halor kane ka Centre. Ha ka jingshisha ngi la pyrkhat ban buh mawnongrim mynta u bnai, hynrei ngi pyrkhat ba u bnai Ïaïong um da dei eh u bnai uba kham bha kumta ngi la rai ban buh maw nongrim ha u bnai Jymmang,” u la bynrap.
U Sangma u la ong ba ka sorkar ka dap da ka jingkmen ba ka la lah ban pynurlong ïa kane ka jingdawa kaba la slem bha jong ka Seng Khasi. Katkum ka jingïathuh jong u ka sorkar kan kyrshan bad ban buh ki cultural centre bapher bapher la ki long kiba heh ne kiba rit ruh kumjuh.
“Ha ki por ba la dep nga la don ha ka thaiñ Karbi bad nga la pynbna ban mang pisa T. 50 Lak na ka bynta ki Cultural Centre jong ki. Nga la ai ruh ïa ki jaitbynriew Rabha bad Kooch, Hajong. Kumta ki la don bun ki jait bynriew bapher bapher kiba kwah ban pynneh pynsah ïa la ki jong ki kolshor bad ka sorkar ruh ka long kaba kmen ban ai ka jingkyrshan na ka bynta ban pynneh pynsah ïa ki kolshor jong ki nongshong shnong ka jylla,” bynrap u Sangma.
Haba ong ba kane ka dei ka project kaba thymmai, u Myntri Rangbah u la ong, “Ka lah ban don ka jingpynthymmai hynrei kane ka project kaba thymmai. Ngi kwah ban long kiba ïasyllok bad ban don ki rukom treikam kiba thymmai, khnang ban lah ban khring shuh shuh ïa ki nongwan jngohkai sha kane ka jylla bad ngan sa kren sha ka organizing committee ban ïarap ïa ngi ban ïatreilang khnang ba ngin lah ban pynbha ïa ki jingtei ha kane ka madan shad Weiking.”