Shillong, Ïaïong 07: Ki shipai ba ai jingïada khappud Border Security Force ki la ïoh kem ïa uwei u briew uba dei na ka ri Bangladesh uba ju donkti ban pynrung tuh ïa ki briew ha khappud.Katkum ka kyrwoh ba la phah da ki BSF la ïathuh ba la kem ïa une u briew da ki shipai BSF Meghalaya najan ka khappud Indo-Bangladesh ha ka 6 tarik mynta u bnai Ïaïong.
La ïathuh ba ki bor syntiat jong ki shipai BSF jong ka 4th Battalion, kiba don hajan Dawki kiba peitngor bha ha ka thaiñ Dawki, kila i shan khmat ïa ka ïaid ka ïeng jong u hajan khappud Bangladesh. Une u briew u la pyrshang ban kiar na ka jingshah peitbniah ha ryngkat bad ka jingpyrshang ban kam sha shilliang pud, hynrei ki shipai BSF kiba la peitngor bha kila ïoh bat noh ïa une u briew ba ki suba.
Ha ka jingtohkit ba nyngkong, une u briew u la pynpaw ba u dei u nong Bangladesh, uba la tip kyrteng kum u Md. Ibrahim uba shong basah ha Sylhet district.Na ka liang ki BSF ki la pyntip ba une u briew u dei ruh u ba ju pynrung beaiñ ïa ki briew ban kam sha shilliang u pud u sam bad kiwei kiwei de ki jait kam ba long beaiñ.Hadien ka jingtohkit ki BSF kila aiti noh ïa une u nong Bangladesh sha ki pulit ka Dawki Police Station ban dang pynlong shuh shuh ïa ka jingtohkit pyrshah ïa u bad kiwei ki kam kiba u ju leh.
