Pynbna u Head Coach ka India ïa ka kynhun ban ïalehkai ha Shillong

Shillong, Lber 07: U coach be heh duh jong ka kynhun ïalehkai phutbol jong ki shynrang ka ri India, u Manolo Márquez, ha ka sngi Palei ula pynbna ïa ka thup kyrteng jong ka kynhun ïalehkai kaba 26 ngut, na ka bynta ki jingïakhun FIFA international window ban long mynta u Lber, ha kaba ka India kaba la tip ruh da ka ‘Blue Tigers’, kan ïakhun ar tylli ki jingïalehkai ha Shillong.
Katkum katei ka thup kyrteng ba la pyllait ha ka sngi Palei da ka AIFF, la ïohi ba u rangïalehkai phutbol bna nam jong ka India, u Sunil Chhetri, u la rai ban mih noh na ka jingshongthait ban ïarap ïa ka kynhun ha kane ka FIFA international window ban wan.
“U Kapten, u nongïalam, u rangïalehkai ba bna nam un wanphai biang sha ka kynhun ïalehkai jong ka ri India na ka bynta ka FIFA International Window ha u Lber,” la thoh ka AIFF ha ka rynsan X.
Ka jingwanphai jong u Chhetri ban phong biang ïa ka sopti jong ka India kan long ha ka wat ïakhun kaba lai jong ka Qualifier na bynta ka AFC Asian Cup 2027 ban long pyrshah ïa ka Bangladesh ha ka 25 tarik u Lber, hadien ba u la shah kynthup ha ka kynhun jong ki 26 ngut ki rangïalehkai jong u coach Manolo Marquez na ka bynta ka FIFA international window mynta u Lber. Kumban shu pynkynmaw, u Sunil Chhetri u la pynbna ban shongthait noh na ka kynhun ïalehkai ri ha u Jylliew jong u snem ba ladep hadien ba ka India ka la ïakhaid bad ka Kuwait ha ka FIFA World Cup 2026 qualifiers.
Nyngkong ka India kan ïakhun ïa ka jingïalehkai paralok pyrshah ïa ka Maldives ha ka 19 tarik Lber kum ka jingpynkhreh ïa ka wat ïakhun ba khatduh jong ka AFC Asian Cup Saudi Arabia 2027 qualifiers pyrshah ïa ka Bangladesh ha ka 25 tarik Lber. Baroh ar tylli ki jingïakhun yn pynlong ha JN Stadium, Shillong.
“Ka jingïoh rung sha ka Asian Cup ka long kaba kongsan bha ïa Ngi. Da kaba pyrkhat ïa ka jingdonkam jong kane ka lympung bad ki jingïalehkai kiba dang sah ha khmat, nga la ïakren bad u Sunil Chhetri shaphang ka jingwanphai biang ban pynkhlaiñ ïa ka kynhun ïalehkai jong ka ri. U la mynjur, bad kumta Ngi la kynthup lang ïa u ha ka kynhun,” la ong u Marquez.
Kaba sngewsih ïa ki nongkyrshan jong ka Meghalaya, ka long ba ym shym la don satia mano mano ruh na kane ka jylla kiba la shah jied ban don bynta ha ka kynhun, watla ki don katto katne ngut kiba la ïalehkai na ka Shillong Lajong FC ha ki por ba la dep, kum u Vishal Kaith, u Chinglensana Singh bad u Naorem Mahesh Singh.
Ka India ka la shah pynngat lang ha kajuh ka group ryngkat bad ka Bangladesh, Hong Kong (China), bad ka Singapore na bynta ka jingïaknieh rung sha ka Asian Cup. Ha kane ka lympung kaba la dep, ka India ka la mad ïa ka lynti ïaid kaba duh jingkyrmen, ha kaba kam shym la lah ban ïaid lyngba wat tang ha ka group stage hadien ba rem ha baroh ki jingïalehkai.
Ka thup kyrteng jong ka kynhun India:
Goalkeepers: Amrinder Singh, Gurmeet Singh, Vishal Kaith
Defenders: Asish Rai, Boris Singh Thangjam, Chinglensana Singh Konsham, Hmingthanmawia, Mehtab Singh, Rahul Bheke, Roshan Singh Naorem, Sandesh Jhingan, Subhasish Bose
Midfielders: Ashique Kuruniyan, Ayush Dev Chhetri, Brandon Fernandes, Brison Fernandes, Jeakson Singh Thounaojam, Lalengmawia, Liston Colaco, Mahesh Singh Naorem, Suresh Singh Wangjam
Forwards: Sunil Chhetri, Farukh Choudhary, Irfan Yadwad, Lallianzuala Chhangte, Manvir Singh