OC Blue SPL 2024: Wat hadien ba shah tam 3 kol ha ka Nangkiew Irat, wanphai ka Laitkor ban pynïakhaid

Shillong, Lber 07: Ka Laitkor SC ka la lah ban wanrah ïa ka jingïalehkai kaba itynnat bha da kaba wanphai nadien ban khur bad ïasam mar shi point bad ka Nangkiew Irat SC da kaba ïakhaid mar 3-3 kol, wat hadien ba ka la shah lamkhmat haduh 3 kol tang hapoh 30 minit ha kawei na ki jingïalehkai jong ka OC Blue Shillong Premier League 2024 ha madan First Ground, SSA Stadium, Polo ha ka sngi Thohdieng.
Ka la long ka jingïakhun kaba itynnat ha baroh ar ki kylla, ha kaba u Damehun Syih (7’) bad u Jefferson Pakyntein (17’, 27’) ki la pynkhih ïa ki lai kol na ka bynta ka Nangkiew Irat ha ka kylla step, katba u Risuk Malngiang (55’) bad u Fridison Wanniang (69’, 75’) ki la pynkhih ïa ki lai kol na bynta ka Laitkor ha ka kylla miet ban pynïakhaid ïa ka jingïalehkai.
Kane ka dei ka jingïalehkai kaba khatduh jong ka Nangkiew Irat ha kane ka samoi bad ka dang ïaineh ha ka kyrdan ba saw ha ka miej, bad mynta ka la ïoh ban kamai 26 poiñ. Ka Laitkor kaba dang sah sa kawei ka jingïalehkai ban pyndep, ka dang sah ha ka kyrdan kaba hynriew da kaba kamai 24 poiñ. Ki ïaryngkat bad ka Langsning FC bad ki don ïa ka jingïapher kol kaba kham bha hynrei ka Langsning ka don ïa ka rekod kaba kham bha ha ki jingïakhun marpyrshah (H2H).
U Jefferson u la don bynta ha ka kol kaba nyngkong, lyngba ka bol pashat jong u na ka corner kick kaba u Damehun u la pyndei tiak da ka khlieh ban pynkhihjar. U Gobindash Singh u la pashat ïa ka bol na liang kadiang na bynta ka kol kaba ar, ïa kaba u Jefferson u la thep da ka khlieh, bad dei ma u uba la thep ïa ka kol kaba lai na tduh jong ka phyllaw kol hadien 10 minit ban lamkhmat da 3 kol.
Ka Laitkor ka la ïoh ïa la ki jong ki kabu ksiar ha ka kylla step hynrei kam shym la lah satia ban ïaid lyngba ki rangapdien jong ka Nangkiew Irat, kaba la ïalehkai bha ban khanglad ïa ki rangïalehkai ka Laitkor.
Hynrei ha ka kylla miet, u kapten jong ka Laitkor, u Risuk, u la shim ïa ka kabu ban pyrshang thep nabar jong ka phyllaw kol kaba la urlong kumba u la thmu. Kane ka la ai mynsiem ym tang ïa ki rangïalehkai jong ka Laitkor hynrei ïa ki nongkyrshan kiba wan sakhi ïa kane ka jingïalehkai, kiba bun na ki ki la shong ha lyndet jong ka kol jong ka Nangkiew Irat.
Nangta, u Banshanlang Nongdhar u la ai ïa ka bol sha ka Laitkor khlem da phikir bad ka la wanpoi ha u Fridison, uba la kynjat pynpar na madan ban ïaid lait ïa u nongap kol jong ka Nangkiew Irat u Rihoklang Khongjoh.
Ka kol pynïakhaid ka dei namar ka jingbym lah ban tehlakam bha ki rangapdien jong ka Nangkiew Irat namar ba kim shym la lah ban pynkiar sharud ïa ka bol ha ka por ba ka Laitkor ka la ñion shakhmat bad u Fridison u la pynsngewsih da kaba thep jlang sha kol, kaba la pynlong ïa ki nongkyrshan bad ki nongïalehkai bad ki nongkitkam jong ka klob ba kin shad kmen.
Naduh kane ka por ka jinglehkai ka la sdang ban noh bad ka Laitkor, ha kaba tang khyndiat por ba ka Nangkiew Irat ka la ïoh ban tehlakam bad ban rah ïa ka bol sha ka phyllaw kol ka liang pyrshah. Hynrei ki rangïalehkai ka Laitkor ruh ki la thait bad kim shym la lah satia ban ïoh ïa ka kol pynjop.
Ka Laitkor kan sa wan biang ha ka sngi Nyngkong ha kaba kan ïakhun pyrshah ïa ka Mawlai SC, kaba ïalam hakhmat, ha ka por 3 baje nohphai sngi. Ka Mawlai ka la jop ïa ka jingïakhun 1st Leg ha ka 04 Kyllalyngkot da da 1-0 kol, bad lada ka jop biang sa shi sien kan pynthikna ïa ka kynhun ba kan rah ha kaba lai sien lynter ïa ka nam lahduh jong ka OC Blue SPL.