Shillong, Lber 07: U Sebastian Gutiérrez (52′, 66′, 78′) jong ka Churchill Brothers, u la khyrwit da ka hat-trick ban btin lynti ïa kane ka klob na Goa sha ka jingjop da 6-1 kol pyrshah ïa ka Shillong Lajong FC kaba la shah pynduna sha ka 8 ngut ki player ha ka jingïalehkai I-League 2024-25 ba la long ha ka sngi Thohdieng ha Goa.
Haduh 12 ngut ki rangïalehkai ki la shah maham da ka yellow card ha kane ka jingïalehkai – hynñiew ngut na ka Churchill Brothers bad 5 ngut na ka Shillong Lajong, kaba ïalehkai shabar nala ïing. Kaba la kham pynjulor eh ïa ka Lajong ka long ba lai ngut ki rangïalehkai jong ka ki la shah beh noh – ba kynthup ïa u Kenstar Kharshong, u Renan Paulino De Souza bad u Marcos Rudwere Genar Silva.
Haba phai sha ka jingïakhun, ka SLFC ka la ïoh ban lamkhmat nyngkong lyngba ka kol na u Marcos Rudwere (27′), uba la thep lyngba ka penalty bad ka kynhun ka la lah ban lamkhmat haduh kaba kut jong ka kylla step.
Watla ki la ïoh ban lamkhmat, hynrei dei ka Churchill Brothers kaba la synshar ïa ka bol bad ïai thom khlem sangeh ïa ka Lajong ha ka kylla miet. Tang hadien 4 minit ba la ïaid ka kylla miet u Kenstar (49’) u la shah beh noh hadien ba ïoh ar tylli ki yellow card; kane ka la ïalam sha ka penalty ba ka liang ka la ïoh ban thep lyngba u Pape Gassama (50′).
Hadien nangta ka Churchill ka la ïoh ban lamkhmat kylla lyngba ka kol ba nyngkong jong u Gutiérrez bad nangta ka Lajong ka la shah pynduna sha 9 ngut ki player hadien ba shah beh sa u Renan Paulino, uba la ïohpdiang ar tylli ki yellow card. Ka jingshah pynduna ki rangïalehkai ka la ban khia ïa ka SLFC bad u Gutiérrez u la bteng ban ïalehkai bha, da kaba pynkhih ïa ka kol kaba ar ïalade bad kaba lai na bynta ka kynhun.
Ka kol kaba saw ka la jia hadien ba u rangap kol jong ka Lajong, u Ranit Sarkar (73′) u la kum bakla thep hi ïa ka bol shapoh kol, bad bud sa ka kol hat trick jong u Gutiérrez.
Ka kol kaba khatduh ka la wan ha ka khyllipmat jong ki minit pynjlan lyngba ka penalty, ha kaba u Marcos Rudwere u la long u rangïalehkai ba lai jong ka Lajong ban shah beh, bad ïa kane ka penalty la thep da u Wayde Lekay (90’+3).
Da kane ka namrem, ka Lajong ka dang ïaineh ha ka kyrdan ba saw ryngkat ki 26 point naki 18 tylli ki jingïalehkai, katba ka Churchill Brothers ka la nang pynjlan ban lamkhmat ha khlieh duh jong ka miej, da kaba kamai 34 point naki 18 sien ïakhun, bad ka tam da 8 point ïa ka Lajong.
Ka Lajong kan pynkhreh ïa ka jingïalehkai kaba bud pyrshah ïa ka Rajasthan United FC ha ka 16 tarik u Lber.
