Pynbna ki nongïalam ba wan tuid palat 20 hajar ki paidbah sha ka rally pynkut ïalap election u ma Sniawbha

Jowai, Rymphang 25 : Ka jingïalap Election ba khadduh jong u ma Sniawbhalang Dhar u kyrtong ka NPP na ka 1-Nartiang Constituency kala kut mynta ka sngi saitjaiñ ha ka shnong Wahiajer West Jaiñtia Hills, haba kheiñ kyllum da ki nongïalam ka party kiba kam ba ka jingwan poi jong ki nongkyrshan kala kot sha ka 25 hajar tam.
Hashwa jong ka jingïaid rally kaba dei ruh ka sien ba nyngkong hapoh ka Constituency ban pynlong kum kane ka jingïaid paidbah na Wahiajer haduh Ummulong, kala don ka jingïalang ha madan ei-ïadaw rong ha Wahiajer, ïa ka jingïalang la pynïaid da u ma Hamkom Khynriam President ka NPP 1-Nartiang Block.
La sdang ïa ka jingïalang da ki jingduwai na u ma T. Shullai bad la ïoh ruh ka jingkren na u CEM ka JHADC ma Thombor Shiwat, MDC ma Jesse Suiam, ma Paia Dhar, ma Yooshida Nongspung, ma Damon Dkhar, ma Mutshwa Thabah nalor kiwei de.
Baroh kitei ki nongkren kila pynpaw ïa ki kam ba bha kiba u MLA ka 1-Nartiang Constituency ma Sniawbhalang Dhar ula synñiang ha kiba bun ki liang naduh ki surok, ki jaka sumar, ki ïew ki hat, ki jaka pule bad kiwei kiwei de ki kam pynroi hapoh jong ki shnong ki thaw ka Constituency.
Ha ka juh ka por kila kyntu ïa ki paid nongkyrshan jong u ma Sniawbhalang Dhar ha kane ka kynti ba kin ai biang ka jingkyrshan ba pura da kaba pynjop don burom ïa u, kila ong kumba ïohi mynta ki kam jong u kiba la kren kham jam bad da ka jingkyrmen ha kane ka san snem ban wan shibun ki jingkylla kin wan hapoh ka Constituency.
Katba na ka liang u ma Sniawbha haka jngkren ula ong naduh ba sdang jong ka jingleit ïalap election ym don kano kano ka jingthut bad u ai ka jingïaroh ïa ki President bad ki Secretary Unit hapoh jong ki 72 tylli ki shnong kiba la ïadonlang ban ai jingkyrshan ïa u bad ka jingwan jong ki nongkyrshan mynta ka sngi dei da ka jingkitkhlieh jong iwei pa iwei.
Ula pynsngew hadien ka 2 tarik kumba ki nongkyrshan kila angnud “yn sa shad kmen haduh ban da tdem pum bad ki kam ruh yn trei ha ban da tdem pum”, kumta kyntu ïa ki paidbah ban mih dang step ha ka 27 tarik bad leit thep ïa ka vote ha ka party NPP ha ka muhor jongka Kot.
“Ka 1-Nartiang kan dei ka Constituency ka ban thaw syndon ïa ka record kaba nyngkong hapoh ka jylla kata ban jop bun tam u nongjop” kam u ma Sniawbha.
Hadien kane ki paidbah baroh kila shim bynta lang da ka jingshong shit ban ïashad ha ka jingïaid Rally (road show) naduh ka jaka ba pynlong jingïalang Wahiajer haduh Ummulong.