Shillong, Rymphang, 25: U Myntri Rangbah ka Jylla Assam u Hmanta Biswa Sarma, ha ka sngi Thohdieng u la iuh kjat ha Shella Constituency ban ïalap elekshon na ka bynta ka kyrtong jong ka BJP na Shella ka Kong Arena Hynniewta.
Ha kane ka jingïalang kaba la pynlong ha madan shong Dharam Basti, la ïashim bynta da ki hajar ngut ki nongkyrshan jong ka BJP na ki shnong bapher bapher.
Haba kren ha kane ka jingïalang, u Himanta Biswa Sarma u la ai ka jingïaroh ïa ka kyrtong ka Kong Arena da kaba ong ba ka dei ka histori ha Shella Constituency ban ïohi ïa ka jingbun jong ki paidbah kiba ai ka jingkyrshan ïa ka BJP kaba ym pat ju ïohi koit ha ki snem ba ladep bad kane ka dei ka jinglah treikam bad ka jingieid jong ki briew ïa ka Kong Arena Hynñiewta.
U la khlei ruh ka jingkular lada ka BJP kawan ha ka bor ha Shella, un sa ïakren bad ka Sorkar Pdeng ban pynïoh ïa ka kad liengsuiñ ha kane ka thaiñ namarba ka long kaba paka bha ban shna ïa ka jaka hiar ki liengsuiñ.
U la kular ruh ban kyntiew arshah ïa ka khaii pateng ha kane ka thaiñ lyngba ki marpoh khyndew, ban pynheh bad ban pynbha ïa ka surok ban pynkloi bha ïa ki nongñiah kali ban poi na Shillong, sha Majai ter ter sha Shella. U la buh ruh ïa ka thong ruh ban plie biang ïa ka karkhana dewbilat, nangta ïa ki skul babha ha ki kyrdan bapher bapher, ki College, ki Hospital bad bun ki jngdonkam ki paidbah ka Shella da kaba kyntu ïa ki paidbah ka Shella mynta ka kynti ki dei ban jied noh ïa u Narendra Modi lyngba ka kyrtong jong ka Kong Arena.
Na ka liang jong ka Kong Arena ka la pynsngew biang ka thong jong ka ban thaw ki aiñ ïada bad ïarap ïa u duk u suk, ki khynnah samla ha ki lad ïohkam bad kular ruh ba kan ym ieh ïa ki paidbah jong ka shnong Shella ha kano kano ka por ba ki donkam namar kadei ka trai shnong kan ïaineh ka trai shnong na ka bynta ki paidbah ka thaiñ Shella. Ka la ong ruh ba ka thong kaba hakhmat eh ka long nan ïoh plie biang ïa ka Border Hat kaba dei ka dohnud jong ka thaiñ Riwar bad ka pliang ja jong kiba bun, ban plie biang ïa ka karkhana dewbilat bad shibun ki jingkylla hapoh ka Shella Constituency.
“Ailad ai nga tang san snem ngan sa pyni da ki kam,” ong ka Kong Hynñiewta.
