Shillong, Rymphang 25 : Ka rally pyni bun paid jong u kyrtong ka Seng United Democratic Party (UDP) ha Mawlai hynne ka sngi Saitjaiñ ka la long kaba shongshit da ka jingshim bynta jong ki hajar ngut ki paidbah kiba la ïa shad ïa risa ban pynpaw ka jingkyrshan ïa la u jong u kyrtong u Bah Process T. Sawkmie.
ïa kane ka jingïaid rally jong ka seng UDP, Mawlai Circle la sdang na Wahumkhrah, ter ter sha surok Mawlai Phudmuri, sha Stand bus, Nonglum, petrol pump, sha Iewrynghep bad pynkut biang ha Wahumkhrah.
Na ka liang ki paidbah nongkyrshan ki la ïaid ha ryngkat ka put ka tem, kaba ki la pyndonkam ruh ïa ka ksing ban pynshongshit ha kane ka jingïaid rally kaba khatduh shuwa ban leit sha ka jingïathep vote ka ban long ha ka 27 tarik mynta u bnai, katba ka jingñiew ïa vote kan ha ka 2 tarik u Lber, 2023.
Na ka liang u Bah PT Sawkmie haba ai jingkren sha ki lad pathai khubor shuwa ka jingïaid ïa ka rally u la pynpaw ba kum u kyrtong jong ka seng UDP u don ka jingkyrmen kaba skhem ba un ïoh ïa ka jingjop ha kane ka ilekshon bad ban wanphai biang kum u MLA jong ka Mawlai.
“Nga sngewkmen ba da ki hajar ngut ki paidbah ki la ïa poi ban pynpaw ka jingkyrshan jong ki na ka bynta jong nga bad kane ka dei ka jingphah ïa ka khubor jong ka jingjop jong ka UDP ha Mawlai,” ong u bah Sawkmie.
Nalor kata u la bynrap da kaba ong, “Horkit hordang ki paidbah ka thaiñ kim dei ban ailad ïa ka seng NPP ba kan synshar biang bad ba kan suhthied ha Mawlai bad ha ka jylla hi baroh kawei, san snem ngi la ïa mad ia ka jingsynshar ka NPP bad la ïohi ba ka jingsynshar jong ki ïa ka jylla kam biang satia.”
Ha kajuh ka por u Bah Sawkmie u kyntu ruh ïa ki paidbah ba kin sngewbha ban ym pynsepei ïa ka vote bad ban jur ba baroh kiba don EPIC ki dei ban thep ïa ka vote ka jong ki ha ka 27 tarik u Rymphang.
“Jied ïa ka UDP ban ai ka jingshakri kaba bha tam ïa ka constituency,” ong shuh shuh u kyrtong ka UDP, uba dei ruh u MLA barim ka Mawlai.
