U Prah u la longdoh longsnam ha ka VPP, lada phim pynjop bun, ngi lah ban duh: Ardent

Shillong, Rymphang 25: U President jong ka Voice of the people Party (VPP) u Bah Ardent Basaiawmoit ha ka sngi Saitjaiñ u la wer ïa ki paidbah nongkyrshan ka VPP ba kin long kiba skhem jingmut ban ïaineh ha ka VPP ym ban shah ïalam bakla ha ki riew shimkabu ïa ki nongkyrshan ka VPP.
Haba kren ha ka jingïalang ba khatduh eh jong ka VPP ha Sohryngkham, u Bah Ardent u la khot ïa ki paidbah ban trei shitom na bynta ban pynjop ïa ki kyrtong kiba ka VPP ka pynïakhun khnang ba ka party kan ïoh noh ïa ka jingithuh kum ka recognised party ka donkam ïa ki paidbah ban pynjop bun ngut ki kyrtong khnang ba u symbol Prah un dei noh u jong tang jong ki kyrtong ba pynïakhun da ka party.
“U Prah u la longdoh longsnam ha ngi bad donkam mynta ban pynjop bun ki MLA khang ba yn ym don shuh mano mano ban lah ban shim ei ïa une u symbol jong ngi,” ong u Bah Ardent.
Shuh shuh u la ong ruh ba ka jingjop jong ka VPP ha kane ka elekshon kan long ka jingseisoh ban bujli noh da ka party rielum kaba paka naduh ka met, ka mynsiem kaba ka don.
“Kumba long mynta ki party riewlum ki la sah sa tang ka shynrong suda kim don mynsiem seng riewlum shuh bad ka dei ka kamram jong ngi ban shimt noh ïa kane ka jaka ba thylli hynrei ban kynjoh shata ka donkam ïa phi ban trei shitom bad ban skhem jingmut,” u la ong.
Haba kren halor ka jingkynnoh da ki katto katne ba ka VPP ka la don ka jingïasylla lupa bad ka TMC bad ba ka jingpynmih ïa ka VPP ruh ka dei namar ka TMC ka la sngewthuh shai kdar ba kan ym lah ban thaw pyrthei sha rilum Khasi-Jaintia, u Bah Ardent u la ong ba ka dei ka jingïalam bakla namar ki la itieng ïa ka bor bad ka jingkhlaiñ jong ka VPP.
“Kito kiba kynnoh ba ka VPP la pynkha da ka TMC ki dei ban tip ba la seng shuwa ïa ka VPP shuwa ba ka TMC kan wan iuhkjat sha ka jylla. Balei ngim kynthoh ïa ka TMC ha ki rynsan elekshon namar ngi shim ba ka dei tang ka seng kaba rit eh kaba ym don satia wat tang ka jingïapur khana eiei bad ka jinghap aireng kan dei bad kine ki party heh kiba kynthup ïa ka BJP, Congress, NPP, UDP,” ong u Bah Ardent.
Lah ban kdew ba kane ka dei ka jingïalang kaba khatduh eh jong ka VPP ha kaba la sakhi da ki hajar ngut ki paidbah ki la wan shim bynta sha ka rally rah prah wat la kiba bun ki paidbah kim shym la lah ban poi shuh ban shim bynta sha ka jingïalang namar ka jingjur ka dheng kali ha naduh na Lad Smit shaduh sor Shillong.