Shillong, Rymphang 25: Katba ka jingjied ïa ki nongmihkhmat ba thymmai ka la nang jan, ka jingpynkhreh jong ka tnat pynïaid elekshon ruh ka la nangjam shakhmat bad ha ka sngi Saitjaiñ la sakhi ïa ki nongpynïaid elekshon kiba la thung da ka tnat Elekshon ha ki kylleng ki jaka ki la kit ïa ki tiar ki tar ban leit sah miet sha ki Polling Station kiba kham jngai ban pynkhreh ïa ka jingïathep vote ka ban long ha ka Lah Sngi U Blei jong ka taiew ban wan.
U Chief Electoral Officer u Bah FR Kharkongor ha ka sngi Saitjaiñ u la pyntip ba ki don kumba 974 ki kynhun ba pynïaid ïa ka elekshon ba la thung na bynta ki 59 tylli ki Constituency bad haduh ka por 9:30 janmiet jong ka sngi Saitjaiñ kumba 893 ki kynhun pynïaid elekshon ki la poi sha ka jaka ba la buh ba kin pynïaid ïa ka elekshon.
U la ïathuh ba kine ki kynhun, ki don kiba hap ban ïaid lyngba ki thiep bad ki sharing lum, ban jam ïa ka wah bad ki jaka kiba eh ban poi briew namar ka jinglong ka lynti synkien hynrei kine ki kynhun ki la poi sha kine jaka da kaba shu ïaid kjat, bad shong ruh da ki ropeway bad da ki lieng kynda.
U la pyntip ba ka Polling Station kaba hab ban pyndonkam da ka lieng kynda ban poi sha ka jaka Polling Station ka dei ka Kamsing Polling Station ha Amlarem Sub Division kaba don tang 35 ngut ki nongthep vote.
“Ki don ki khynhun jong ngi kiba hap ban kit da ka khoh ïa ki EVM ban pynpoi sha jaka thep vote khnang ba baroh kiba la don ka hok ban thep vote kin ïoh pyndonkam la ka hok,” u la ong.
U CEO u la pyntip ba ka kynhun pynïaid elekshon kaba dei peit ïa ka Rongcheng Polling Station ha South Garo Hills ka la hap ban ïaid kjat haduh 8 kynta, da kaba mih lypa naduh ka step sngi Saitjaiñ.
Kiwei kiwei ki kynhun pynïaid elekshon ki la hap ban ïaid kjat haduh saw kynta ban poi sha ki polling station.
Ki 2,445 kynhun kiba hap ban pynïaid ïa ka elekshon kin sa leit sha ki polling station ha ka sngi U Blei, shi sngi shwa ka sngi thep vote.
Ïa ka jingthep vote la pynsangeh shwa ha Sohïong Assembly Constituency kaba don 63 tylli ki polling station, na ka daw ka jingkhladnoh jong u kyrtong ka United Democratic Party (UDP) u Bah HDR Lyngdoh uba long u Myntri barim ka tnat Kam Pohing ha ka 20 tarik Rymphang.
