Europa League: Ka Man Utd pyrshah ïa ka Real Betis, ka Arsenal pyrshah ïa ka Sporting Lisbon

0

Old Trafford-Manchester (England), Rymphang 26: Katkum ki khubor bala ïohlum, la ïoh jingtip ba ka kynhun ïalehkai jong ka Premier League, kata ka Manchester United kan sa ïoh ban ïa aireng pyrshah ïa ka Real Betis ha ka Roud-16 jong ka lympung Europa League mynta ka samoi.
Kane ka la wan hadien ba katei ka kynhun kaba la ïalam da u Erik Ten Hag kum u manager ka la lah ban pynliem ïa ka Barcelona da 2-1 kol ha Old Trafford ban khylliap ïa ka jingïakhun hapdeng jong ki da 4-3 kol ka aggregate.
Shuh shuh, ki khubor ki la ïoh ban pynthikna ba ka Manchester United kan sa ïa aireng pyrshah ïa ka Real Betis, katba ka Arsenal kan sa hap ban ïakhun pyrshah ïa ka Sporting Lisbon.
ïa kane la pynthikna hadien ba ladep ban pynkhalai ïa ki kynhun baroh kiba la ïohrung sha ka Round-16 jong kane ka lympyng lehkai Europa League mynta ka samoi.
Haba phai sha ka Arsenal, kan sa ïoh ban pdiang ïa ka jingïalehkai 2nd leg hala ïing hadien ba ka la ïoh ban bteng ïa ka jingïaid lynti da kaba lamkhmat ïa ka Group jong ka naduh kaba sdang jong ka lympung, katba na ka liang jong ka Manchester United kan pdiang ïa ka jingïakhun shuwa hala ïing, kata ha Old Trafford pyrshah ïa ka Real Betis.
Na ka liang jong ki bor pynïaid jong kane ka lympung ki la pynbna ba ka Europa League Round-16 kan sa sdang naduh ka 9 haduh ka 16 tarik u Lber.
Ha kawei pat ka lympung, ka West Ham United kan sa ïakhun pyrshah ïa ka AEK Larnaca ha ka Europa Conference League Round 16
Haba phai pat sha ka Arsenal, ka kynhun kaba lamkhmat ïa ka Premier League mynta ka samoi, ka la ïoh ban bteng ïa ka jingïaid lynti jong ka hadien ba ka la wan ha ka kyrdan ban nyngkong na ka Group A, da kaba khur namjop haduh san sien naki hynriew sien ïalehkai.
Katba na ka liang jong ka Sporting Lisbon, ka don ha ka kyrdan ba saw ha ka miej ïakheiñ point ka lympung Portuguese top flight, ka la pynliem ïa ka klob na Denmark kata ka Midtjylland da 5-1 kol ha ka jingïalehkai play-off hadien ba ki la wan ha ka kyrdan ba lai na ka Group jong ka Champions League mynta ka samoi.
Ka kynhun kaba la ïalam da u Manuel Pellegrini, kata ka Real Betis ka don ha ka kyrdan ba san ha ka lympung lehkai La Liga ka la lah ban khylliap ïa ka Group Stage jong ka Europa League khlem da shah rem, da kaba khur namjop san sien bad ïakhaid shi sien na ki 6 sien ïakhun.
Haba phai pat sha ka kynhun kaba la rah haduh hynriew sien ïa ka namlahduh jong kane ka lympung, kata ka Sevilla kan ïakhun pyrshah ïa ka Fenerbahce, katba ka kynhun kaba la lamkhmat da u Jose Mourinho kum u manager, kata ka Roma kan ïakhun pyrshah ïa ka Real Sociedad – kaba wan ha ka kyrdan ba nyngkong ha ka Group jong ka Manchester United.
Kine ki phra tylli ki kynhun kiba la wan shakhmat ha ka Europa League group stage ki la shah pynkhalai ryngkat bad ki kynhun ba la ïohrung lyngba ka knockout round play-off, bad ïa ki klob kiba hap ha kajuh ka lympung la ïoh ban pynkhalai ha ka rukom ba kin nym pat ïatyngkhuh hashwa ka quarter final.
Ki kynhun ki ba dang sah ha kane ka lympung lehkai jong ka Europa League ki long kumne:
Ka Union Berlin pyrshah ïa ka Union Saint-Gilloise,
Ka Sevilla pyrshah ïa ka Fenerbahce,
Ka Juventus pyrshah ïa ka Freiburg.
Ka Bayer Leverkusen pyrshah ïa ka Ferencvaros
Ka Sporting Lisbon pyrshah ïa ka Arsenal
Ka Manchester United pyrshah ïa ka Real Betis
Ka Roma pyrshah ïa ka Real Sociedad
Ka Shakhtar Donetsk pyrshah ïa ka Feyenoord.

Leave A Reply

Your email address will not be published.