Ha ka MDA ym don nongïada, ki don tang ki nonglilam khyndew: Robert Kharjahrin

Hiar pynshai ki nongïalam ka HYC ha Langpih

0

Nongstoiñ, Rymphang, 26: Ki nongïalam ka Hynñiewtrep Youth Council ha ka sngi thohdieng, ki la hiar sha Langpih ban pynshai sha ki paitbah ba ha kane ka election ka ban long ha ka 27 tarik, ba shuwa ba kin mih na ki ïing jong ki ban leit thep ïa ka vote, ki dei ban da pyrkhat bad puson bha, namar lada ki bakla ha kane ka kynti ka jingbabe bad ka jingtim kan long ïa ka pateng ban wan.
Ha katei ka jingïalang kaba la pynïaid da u samla Wanteibok Lyngdoh general secretary ka HYC West Khasi Hills la ïadon lang da ki rangbah shnong ki longkmie longkpa bad ki paitbah ki la ïa shah shkor dngong ïa ki jingkren ki nongïalam ha katei ka sngi.
U Bah Robertjune Kharjahrin President rangbah haba pynshai paitbah ha katei ka sngi, u la ong ba ha kine ki san snem ba la dep ha ka jingsynshar jong ka sorkar MDA ba la ïalam da ka NPP, ki paitbah ki la mad shibun ki jingeh na ka jingkiew dor ki mar ki mata na kadaw ba jingpynkiew ïa ka khajna, hynrei wat la katta ruh ka sorkar ka dang sah ram da ki spah klur namar ba la jur palat ka bamsap. U la ong ruh ba ym shuh lah ban len ïa kata namar ym dei ba ka HYC ka shu thaw, hynrei la pynpaw syndon da u Amit Shah u Myntri kam Pohïing ka sorkar pdeng haba u wan ha Tura.
Utei u nongïalam ka seng u la ong ruh ba ki nongmihkhmat ba ki paitbah ki la jied ha u 2018 bad kiba don lang ha ka sorkar MDA, kim dei satia ki nongïalam hynrei ki dei ki nonglilam ïa ka khyndew ka shyiap, khamtam ha West Khasi Hills ha kaba ïa ki 12 tylli ki shnong kiba hap ha ka hima Nonglang Sirdarship, la die lilam sha ka Assam ha ka por ba ki ar ngut ki Myntri Rangbah ki la ïasoi ïa ka skular pynbeit pud.
Halor katei ka jingleh, ki paitbah ka hima Nonglang lem bad ki nongïalam jong ki sengbhalang ki hap ban ai da ka mokotduma shaduh Supreme Court. U la ong ruh ba na ka bynta ban saiñ dur ïa ka lawei ka jong ki khun ki kti, ka shong ha ngi ki kmie ki kpa. Ha kane ka kynti lada bakla ban jied ïa ki nongmih-khmat kam myntoi shuh ban babe hadien.
U la buh jingkylli ruh da kaba ong ba mano ba pynpoi surok rong ha Langpih. Mano ba pynïoh ïa ka Raid-mynsaw school building bad kiwei kiwei pat ki skul ha katei ka thaiñ. Mano ba pynïoh ïa ka Border Outpost ha Langpih. Hato ka dei ka sorkar MDA ba la ïalam da ka NPP ?.
Nalor kata u la ong ruh ba kum u nongïalam jong ka seng, u nud ban kop bad ban ong ba ha kine ki san snem naduh ba ka NPP ka la ïalam ïa ka sorkar ha ka jylla ha ka thaiñ Langpih, ym pat don dak ei ei ei wat tang khyndiat ruh. Hynrei ki dak ki shin baroh bad ki kam pynroi ki dei ki matti ba la leh da ki nongmihkhmat na ki party riew lum.
U la ong ruh ba ka por ka dang biang ïa ki paitbah ka thaiñ Langpih ba kin kylla kaba mut bad ba kin phai noh sha ki party riewlum, namar lada kin dang ailad ba ki Sangma kin synshar ïa ka jylla kan sa poi ka por ba ka jaitbynriew kan sa jah rngai syndon na kane ka sla pyrthei.

Leave A Reply

Your email address will not be published.