Nongstoiñ, Rymphang, 26: Ka election ban jied ïa ki nongmihkhmat sha ka Ïingdorbar Thaw Aiñ ka jylla ka la poi, ha kaba ki kyrtong kiba la mih madan ban ïa aireng ha kane ka kyntiki la duh thiah duh dem miet la bad sngi. Ki don ruh ki kyrtong kiba la pyrshang ban pynlut pisa na ka bynta ban thied ïa ki paitbah nongshong shnong, khnang ba kin ai ka jingkyrshan.
Ki don shibun ki sengbhalang kiba la shim ka jingkitkhlieh ban buddien ïa ka ïaid ka ïeng jong ki kyrtong bad ki nongïalam jong ki seng saiñ pyrthei bapher bapher haba ïaid shane bad shatai, khnang ba kin lap la ki sam pisa ne em sha ki paitbah nongthep vote.
Napdeng kiba bun ki sengbhalang ka Federation of Khasi Jaiñtia & Garo People Rambrai circle, ka dei kawei na ki sengbhalang kiba la trei shitom miet bad sngi ban khang lad ïa ki kyrtong kiba thmu ban pybiej ïa ki paitbah da kaba sam pisa.
U Bah Jiedstarlan Lyngkhoi President ka FKJGP Rambrai circle haba pyntip ha u nongthoh khubor u la ong ba la kumba shitaïew ei ei, ki nongïalam bad ki dkhot ka seng ki la peitngor bha bad ki la don ki khep ba ki la ïoh jingtip ba ki don ki briew jong ki kyrtong, kiba thmu ban leit sam pisa sha ki longïing jong ki nongshong shnong bad ki la pyrshang ban khang kdong bun bun sien.
Utei u nongïalam ka seng u la ong ruh ba ha kine ki lai sngi, ki dkhot ka seng ki la ïakhun da kaba tyngeh ban swait bad peitngor bha ha man la ki shnong bad la bthah ruh ïa baroh ki nongkitkam bad ki dkhot jong ki Unit bapher bapher kiba hap hapoh ka Rambrai Circle, ba kin ym kheiñ sting hynrei ba in trei shitom bad peitngor bha, khnang ban lait na kino kino ki jingshah kynnoh hadien ha bud bad ba ka jingjied ïa ki nongmihkhmat kan long kaba khuid ba suba.
U la ong ruh lada ka seng ka lap ïa kiba pynkheiñ ïa ki kyndon ka Election Commission bad kiba ïaleh pyrshah ka seng kan aiti beit sha ki bor ka aiñ.
