Dei ban weng kam mardor ym dei ban ap haduh ban kut elekshon: Wantei Lyngdoh

Nongstoiñ, Rymphang, 26: “Ka Hynñiewtrep Youths’ Council West Khasi Hills District, kam lah khlem da ai khublei ïa ka Khasi Students Union West Khasi Hills District, kaba la shimkhia ban sei ïa ki kam jaboh ha ki tnad treikam jong ka sorkar ha West Khasi Hills, ha kaba ka la lap shibun ki kam ha ki tnad bapher bapher, kiba lait la shu thung sop sop khlem da ïaid da ka lynti ba khuid hynrei la shu thung jubor ïa ki”, ong ka kyrwoh khubor ba la phah da u General Secretary jong ka HYC West Khasi Hills samla Wantei Lyngdoh.
“Kane ka long kaei kaei kaba ngi kum ka Seng ngim lah ban pdiang da lei lei, namar ka pynshlur ïa ka kam thok shukor da kaba knieh ïa ka hok jong ki khun Samla jong ka thaiñ, kiba dei hok ban ïoh kiba lah trei shitom lyngba ka jingkyrshan ki kmie ki kpa. Kane kan dei ka lawei jong ka jingdum lada leh kumne bad kiba bun ki kmie ki kpa, kin duh jingkyrmen ban phah skul, khamtam kan ktah ïa ka ri bad ka jaidbynriew jong ngi”, u la ong.
“Kumta halor ka shithi ba lah phah da u Superintending Engineer PHE Western Circle Nongstoiñ ha ka 9 tarik Rymphang sha u DC, ban panmap ba la bakla ba la shu thung khlem jingtip ka District Selection Committee (DSC) bad u la ong ba un sa weng noh hadien ka Election ïa kine kiba lah thung. Na ka liang ka Seng kam pdiang ïa kane, hynrei dei beit ban weng noh mynta shwa ka jingpynbna ïa ka Result Election”.
U la ong ruh, “Ka Seng ka don ka jingsuba ba don ei ei sha lyndet ba leh ïa kane ka jingthung kam sop sop. Ban lait na ka jingtuklar mano mano hadien Election ïa kine kiba sha thung kam sop sop dei ban weng noh. Lym kumta ym I don jingkyrmen ban shah weng nabar ba don ba tuklar.
“Ha kajuh ka por ka Seng ka dawa ïa u DC ba dei ban pynshitom ïa kiba don kti ha kane ka jingthung kam sop sop ha kine ki Department Sorkar. Na ka liang Seng kan sa leit ïa kynduh ïa u DC halor kane ka bynta”, ong u samla Wantei.