Nongpoh, Nohprah 12: U Kyrtong ka Congress party na Mawhati u Bah Dominic Mynsong mynta ka sngi u la pynpaw ïa ka jingskhem mynsiem ban jop beit ha ka election MDC na Mawhati, ha kaba u la pynpaw ba wat la u MLA bad MDC ka Mawhati u Bah Chares Marngar, uba la jop na ka party Congress u la phet noh sha ka party NPP, namar ki paidbah nongkyrshan ka Congress ki dang ïaineh skhem ha ka party Congress.
Na ka liang u Bah Dominic u la pynpaw ïa ka jingsngewskhem ban jop, ka dei ha ka jingïalang kaba la long mynta ka sngi ha ka shnong Jatah, ba ka party Congress lyngba ka Ri Bhoi District Congress Committee ki la pynbna syndon ba u la dei u kyrtong ba pura ka party Congress ban aireng ha ka election MDC na Mawhati Constituency.
Ha kane ka jingïalang ba la pynskhem ïa u Bah Dominic Mynsong kum u kyrtong ka Congress ban ïa khun ïa ka election MDC na Mawhati la sakhi lang ruh da ka jingdon lang u President ka RBDCC u Bah M.G Kharshanlor, u Bah John Lamarai, President ka Mawhati Block, u Bah Phrangsngi Syngkli, President ka Jirang Block, u Bah Sunlight Shadap Working President ka RBDCC lem bad kiwei kiwei ki heh nongïalam ka party Congressna Ri Bhoi.
Ki nongïalam ka Congress kiba la ai jingkren ha kane ka sngi, ki la pynpaw ba ki don ka jingsngewskhem ba ka party Congress kan jop ha kane ka election MDC na Mawhati, namar ki paidbah katei ka Constituency ki dei kiba shaniah ha ka party Congress kum kawei ka party kaba ju shakri kyrpang ïa ki paidbah bad ruh dei ka party congress kaba la wan rah shibun ki jingkylla ha ka jylla bad ka ka ri hi baroh kawei.
