Shillong, Nohprah 12: Ïa ka lyngkhuh sngi ïap ba 152 snem jong u nongïaleh laitluid ki jaitbynriew Garo u Pa Togan Nengminja Sangma la rakhe ha ka jylla ha ka sngi Palei ha Chisobibra hajan Williamnagar ha kaba u Myntri ka tnat Soil and Water Conservation, PHE bad Housing, u Marcuise N Marak u la long u kongsan bad u CEM ka GHADC, u Albinush R Marak, u la long u symbud kongsan.
Haba kren ha kane ka sngi, u Marcuise u la ong ba u Pa Togan Nengminja Sangma u la nohsynniang shibun bha ha kaba ïadei bad ka jingïakhun laitluid ka ri India na ka kti ki dohlieh bad u la ïathuh ruh ba u dei u briew uba la ai mynsiem ïa ki paid Garo ban ïaineh laitluid na ki kti ki nongsynshar mynder ri.
Kiwei kiba la kren ha kane ka sngi ki kynthup ïa u CEM ka GHADC, u Albinush R Marak, u Deputy CEM ka GHADC, Nikman Ch Marak bad u president jong ka Pa Togan Nengminja Sangma Mahari Association (PTNSMA). Ïa ki kyntien khublei ha kane ka sngi la ai da u Secretary, Arun N Marak.
