Khliehriat,Nohprah 12 : Ka Dorbar Shnong Moolamylliang, East Jaiñtia Hills District, ka khot bad wer ïa baroh ki paidbah kiba na jan bad kiba na jngai ban wan jngoh ïa ka shnong ka thaw kaba yn sa pynlong biang ïa ka jingpynthaba ding chrismas 2024 kumba ju pynlong man la u snem.
Katkum u kyrwoh ba la wan lyngba u Waheh Shnong Moolamylliang, u bah Apmon Pashiang, la ong ba ïa katei ka jingpynthaba ding Chrismas ne ka Christmas Lights extravaganza yn plie paidbah naduh ka 18 tarik mynta u bnai nohprah 2024 bad yn pynneh haduh ka 3 tarik u bnai kyllalyngkot 2025.
Ïa ka jingpynthaba ïa ki ding ha ki rong bapher bapher ha ka rukom ba itynnad bha lane ka Christmas Lights extravaganza yn sdang naduh ka 18 tarik u nohprah naduh ka por 5 baje janmiet haduh ka 3 tarik u kyllalyngkot 2025 bad kin don ruh ki prokram bapher bapher ba kynthup ruh ka Musical Night kaba yn pynlong ha ka 24 tarik u nohprah ha kaba ka kynhun tem ka “Magnificent Obsession” kaba na Jowai kan wan ban pynshongshit ha katei ka Musical Night.
Related Posts
Kan don ruh ka Gospel Concert ha ka janmiet jong ka 25 tarik u nohprah 2024 ka ban sdang naduh ka por 6 baje janmiet ha kaba u DJ Wanshan bad u Eladmitre Dkhar ki long ki nongshah khot sngewbha lane ki Guest Artist.
Kum ban shu bynrap, ka shnong Moolamylliang ka dei kawei na ki shnong kaba la paw bha kum ka wei na ki shnong kaba khuid bad kaba la ïoh khur ruh shibun tylli ki khusnam ha kaba ïadei bad ka jinglah ban pynneh pynsah ïa ka khuid ka suba ha shnong bad ha kaba lah ruh ban pynneh pynsah ïa ka mariang kaba kup rong jyrngam.
Da ki phew hajar ngut ki briew kiba dei ruh ki nongjngohkai pyrthei ki ju wan ban jngoh bad sakhi ïa ka jingitynnad bad jingkhuid kane ka shnong Moolamylliang kaba don ha ri lum Jaintia, lah ban ong ba kane ka jingïoh burom jong ka shnong ka thaw ka dei ruh namar ki nongshongshnong kiba hapoh ka jinglam khmat u Waheh Shnong, u bah Apmon Pashiang ki don ka mynsiem ieid mariang bad ki ju shim khia bha ha kaba pynkhuid pynitynnad ïa ka shnong ka thaw bad thung pynwandur itynnad bha ïa ki dieng, ki siej, ki syintiew ha shnong, ha ki lynti shnong.