Ki nongthep vote kin sa bishar ïa ki party ba kwah ban pynduh ïa ka District Council: Thomas

Shillong, Nohprah, 12: Ka Khun Hynniewtrep National Awakening Movement (KHNAM) ka la ong ba ki paidbah nongthep vote kin sa ai ïa ka jingbishar kaba hok ïa ka seng saiñpyrthei kaba kwah ban pynduh noh ïa ka Autonomous District Council ha kane ka jylla.
Ha ka jingïakren bad ki lad pathai khubor u Working President jong ka KHNAM u Bah Thomas Passah u la ong, “lada ki katto katne ki seng saiñpyrthei ki pyrshah ïa ka District Council bad mynta ki ïashim bynta ha ka elekshon District Council nga tharai ki paidbah kiba stad kin sa ai ïa ka jingbishar ha kane ka kynti.”
Katkum ka jingong jong u, ka Khyrnit Bahynriew ka dei ka stieh ïada kaba khlaiñ ïa ki jaka riewlum khamtam ha rilum Khasi bad Jaiñtia ban ïada ïa ka hok jong ki riewlum ritpaid.
U Bah Passah u la pynmih ïa kane ka jingkynthoh halor ka jingdawa jong ka Voice of the People Party (VPP) kaba dawa ban pynrung ïa ka Meghalaya hapoh ka Article 371.
“Na ka liang ngi, ngi kwah ban kren da kaba shai ba ngim lah ban lait noh na ka Khyrnit Bahynriew. Ngi donkam ïa ka Khyrnit Bahynriew. Khlem artatien ba kin don ki jingbakla ha kaba jingpyntreikam ïa ka District Council hynrei kane ka dei na ka daw jong ki seng saiñpyrthei bad na ka daw jong ki MDC kiba la shah jied la slem mynta bad mynta ban ïohi ïa ka iktiar jong ka Khyrnit Bahynriew, ka bor jong ka District Council ngi donkam ïa ka party kum ka KHNAM, ban ïoh lad ban don ha ka bor khnang ba ngin dup lah ban wanrah shibun ki jingkylla. Na kata ka daw, ngi kwah ban kren da kaba shai ba ki District Council ki long kiba kongsan bha bad ngim don kyntien bor ban ong ba ngi dei ban pynduh noh ïa ki District Council,” ong shuh shuh u Bah Passah.