Nongpoh, Ïaiong 07: Ha kawei ka jingjia aksiden ba shyrkhei, 2 ngut ki samla kila khlad noh syndon hashen hadien ba u nongñiah jong kawei ka alto 800 u la leit ban tynrah nadien jong kawei ka trok bym lah ban ithuh ha surok bah National highway NH 6 haka shnong Umlyngkdait ha Ri-Bhoi District.
Katkum ka jingtip bala ioh lum naki pulit ka Nongpoh Traffic Police kila ïathuh ba kane ka jingjia kala jia haka por 12:05 eiei hynne shiteng synñia ha kaba katei ka Alto 800 kaba don ïa u Number ML 05 R 8598 balla ñiah da u Robi Paswan 30 snem ka rta, na Lumparing East Khasi Hills, ryngkat uwei pat u paralok bala tip kyrteng kum u Shri Prakash 26 snem ka rta na Bangalore, ki dang mih na Shillong ban hiar sha Guwahati, hynrei ynda poi haka shnong Umlyngkdait u nongñiah katei ka Alto 800 u la leit ban tynrah beit nadien jong kawei ka trok ka bym lah ban ithuh satia haduh ba ka kali jong ki kala pra phum.
La ong ruh ba ha katei ka jingjia kitei ki 2 ngut ki samla ba shong ha katei ka Alto kila khlad noh syndon hashen, bad katei ka trok kala phet krad na katei ka jaka.
Ki pulit ka Nongpoh Traffic tang hadien ka jingioh jingtip kila leit mar mar sha katei ka jaka ban pynlong ka jingtohkit bad sei noh ïa kitei ki 2 ngut kiba la sahkut hapoh katei ka Alto ban rah pat sha Nongpoh Civil Hospital bad ka jingtohkit halor katei ka jingjia ka dang ïaid shakhmat.
