Nongpoh, Jylliew 27: Haduh 7 ngut ki dkhot ka longïing ki la mynsaw jur bad ka ïing ka sem ka la kylla dpei noh, kaba dei hadien na ka jingshah tied kynsan ha u Pyrthad kaba la jia hynnin ka janmiet ha ka Shnong Umsohlait ha Ri Bhoi.
Kumba la ioh lum jingtip da u Rangbah Shnong, u Bah Leky Challam, u la ïathuh ba kane ka jingjia ka la jia ha ka por 3 baje ei ei janmiet ha kawei na ka dong jong ka shnong ba la tip kum ka dong Kimheh bad na kane ka jingthied u pyrthad ki 7 ngut ki la mynsaw bad ka ding kaba la klang na ka jingtied u pyrthat ka la bamduh bad pynkylla dpei ïa baroh ki jingdon jingem bad ka ïing ka sem.
Kitei ki 7 ngut kiba la mynsaw ki kynthup ïa u Bah Johnsing Lynshing (29), ka Kong Martha Shadap (55), ka heprit Driamizaca Shadap (4), u Samla Banaibor Lyngdoh (20), u Heprit Kyrshanborlang Mynsong (11), u heprit Banraplang Khongsam (5) bad ka Kong Kristina Mynsong kaba dei ka trai jong katei ka ïing ba la shah tied ha u pyrthad.
Halor kane ka jingjia, kumba la ïathuh da u Rangbah Shnong ka Shnong Umsohlait, u Bah Leky Challam, la ong ba ïa kitei kiba la mynsaw la pynkit noh mar mar sha Mawhati PHC ban ioh ïa ka jingsumar, hynrei namarba la jur ka jingmynsaw la pynkit biang noh ïa ki sha ki Hospital kiba don ha Nongbah Shillong na ka bynta ban ioh ïa ka jingsumar kaba kham paka.
U la ong ruh ba na ka liang ka bor shnong ki la pyntip sha ki bor pulit halor kane ka jingjia ba kin leh ïa kaba donkam bad kumba long na kane ka jingjia ka la long ka jingisangsot ïa katei ka ïing ka sem nalor ba ki la mynsaw bad ki la duh lut ruh ïa baroh ki jingdon jingem na ka daw ba ka ding ka la bamduh ïa ki jingdon jingem bad ka ing ka sem kaba dei na ka jingtied borbah jong u pyrthat.
Shuh shuh, u la ïathuh ruh naduh ki khaw, ki jain ki nep, ki tiar ki tar, u kba, u syieng bad ki jingdon jingem katei ka ïing la kylla dpei lut bad haba khein kyllum ka jinglut ka ka kot sha ka T. 3 lak na kane ka jingpynjulor u pyrthad uba la bom kynsan ïa katei ka ïing ha Umsohlait.
Na ka liang jong u kum u rangbah shnong ruh u la buh ka jingkyrpad sha ki bor sorkar bad sha ki nongmihkhmat paidbah ba kin phai khmat lem sha kane ka longïing kaba la duh lut ïa baroh ki jingdon jingem bad ha kum kane ka por katei ka longïing ka donkam shisha ka jingïarap na ka bor sorkar halor kitei ki jingduh bad ki jingjulor kiba la ktah na ka jingbom kynsan u pyrthad khlem poi pyrkhat, u la bynrap.
