Shillong, Rymphang 19 : Ka Phlim Ka Chithi ba la pynmih da ka Kong Simi Khongtiang ka la shah jied ban pyni ha ka Bengaluru International Film Festival 2024 kaba Khatsan ka ban long naduh ka 29 tarik Rymphang haduh ka 7 tarik Lber 2024 ha Bengaluru.
Kane kan long ka sien ban sah jingkynmaw ha ka histori ki Phlim na ri lum Jaintia namar kane ka phlim Ka Chithi ka dei kaba phlim ba nyngkong eh ban shah jied ban pyni ha katei ka rynsan ba pawnam jong ki phlim hapoh ka ri India bad kiba na bar ruh.
Ka Bengaluru International Film Festival ka dei ka rynsan kaba pawnam bha ïa ki phlim namar la jied ïa ki phlim na kylleng ki ri ka pyrthei ban bishar bniah ban ïoh rah ïa ki khusnam. Ka phlim Ka Chithi ka la shah jied ban ïakhun bad kiwei ki phlim ba pynmih ha India kiba don haduh 11 tylli kiba la jied na ki jylla bad thaiñ bapher bapher jong ka ri India.
Ha katei ka rynsan yn ïadon lang ruh ki kynrem ki lyndang, ki aktor, aktress, ki nongpynmih phlim bad ter ter. Lyngba ka phlim Ka Chithi ki nongsakhi kin ïohi ruh ïa ka jingriewspah ka deiti ka kolshor ne ka lariti jong ki nong Jaintia.
Nalor ka phlim Ka Chithi ki don sa ar tylli ki phlim kiba shah jied na kane ka thaiñ bad kine ki long Joseph’s Son na Manipur ba la pynmih da u Haobam Paban Kumar bad ka Samparpan na Assam ba la pynmih da u Arup Manna.
Ka AntHill Production bad ka Director jongka phlim Ka Chithi ka kong Simi Khongtiang ki pynpaw ka jingsngewnguh bad ai khublei ïa baroh kiba la ïadon bynta ha kaba ak bad pynwandur ïa ka phlim Ka Chithi. Ki ai khublei ruh ïa baroh ki nongkyrshan ïa kane ka phlim ha kane ka jylla, ka thaiñ bad khamtam kito baroh kiba na Jaintia Hills.
