681 klur mang ka MORTH ka bai jaka na bynta ka Western Bypass, pyntip u DyCM ha Iing Dorbar

Shillong, Rymphang 19 : U Symbud Myntri Rangbah ka jylla, Bah Prestone Tynsong ha ka sngi Nyngkong u la pyntip ha Iing Dorbar ba ka Ministry of Road Transport and Highway ka la mang haduh 681 klur tyngka na ka bynta ban siew ïa ka bai jaka ban shna ïa ka 2-lane Shillong Western Bypass. Haba jubab halor ka jingkylli ba wanrah da u Nongïalam ka Liang Pyrshah, Bah RV Lyngdoh ha ka Dorbar Mangtynga, u Bah Prestone u la pyntip ruh ba ka por ba la buh ba pyndep ïa katei ka projek ka dei ar snem naduh ka sngi ba sdang ïa ka kam.
“Dalade nga la buddien hi ïa kane ka kam bad nga sngewkmen ban pyntip ba ka Ministry of Road Transport ka la mang 681.63 klur tyngka kum ka bai jaka bad mynta ngi ap sa tang ïa ka pisa ban poi sha ki Deputy Commissioner bad nga tikna ba ngin sa ïoh noh ïa kane ka pisa hapoh kane ka snem mangtyngka,”ong u Bah Prestone.
Shuh shuh u la ïathuh ruh ba kane ka surok 2-lane jong ka Western Bypass kan sdang najan Lad Umsaw bad kan kut pat ha ki bynta jong ka Lad Mawreng.
Shwa kane, u Nongïalam ka Liang Pyrshah, Bah Ronnie V Lyngdoh u la kyntu ïa u Symbud Myntri Rangbah ba un tuklar lang ban pynstet ïa ka jingshna ïa ka Western Bypass khnang ban pynduna ïa ka dheng kali ha nongbah Shillong.
U la ai ruh ka jingïaroh halor ka jinglah jong ka sorkar jylla ban pynbeit ïa ka bai jaka kaba la mih jingeh haba ïadei bad ka projek Shillong Dawki kaba ka kam ka ïaid mynta shakhmat.