Ban ïada ïa ka tyllong um Wah Umiew bad wah Ganol pyntip u CM ba la mang haduh 344 klur tyngka

By Mawphor News Desk On Feb 20, 2024

Shillong, Rymphang 19 : U Myntri Rangbah ka jylla, Conrad K Sangma ha ka sngi Nyngkong u la pyntip ba la mang haduh 344 klur tyngka na ka bynta ban ïada ïa ki ar tylli ki tyllong um ba kongsan tam jong ar tylli ki kwah, kata ka wah Umïew ha East Khasi Hills bad ka wah Ganol kaba don ha rilum Garo.
Haba pyntip ïa kane ha Iing Dorbar, u Myntri Rangbah u la ong ba dang ha ka taïew ba la dep ki la pyllait paidbah ïa ki projek na ka bynta katei hi ka phang.
“Kane kadei ka sienjam kaba kongsan tam ban ïada bad pynneh pynsah ïa ki tyllong um jong ka wah Umïew bad ka wah Ganol,” u la bynrap biang.
Shuh shuh u la pyntip ba ka Meghalaya kadei ka jylla kaba nyngkong ban don ïa ka State Water Policy bad ki don ruh bun tylli ki projek ban ïada ïa ki tyllong um ha ka jylla.
“Ngi dei mangi na ki katto katne ki jylla kiba treilang bad ka North Eastern Space Application Centre (NESAC) bad ngi la dep ban buh dak ruh kumba 50,000 tylli ki umpohliew,” u la ong.
Nalorkata, u ïathuh ruh ba ka sorkar jylla ka dang trei ruh na ka bynta ban don haduh 400 – 500 tylli ki jaka pynlang um ha ka jylla.
U Myntri Rangbah u ong ruh ba ka ishu ba ïadei bad ka um kadei ka mat kaba ki la shimkhia hynrei kam dei satia pat ka kam kaba suk namar ka tyngkhuh bad ka jingkylla ka suiñbneng.
Shwa kane, u Nongïalam ka Liang Pyrshah, Bah RV Lyngdoh u la kyntu ïa ka sorkar jylla ba ka dei ban ïada ïa ka tyllong um jong ka wah Umïew kaba la nang ring tyrkhong na ka daw bym don ka jingïada kaba biang.
Shwa kane, u Myntri ka tnad PHE, Marcuise N Marak u la ong ba da ka thong ban ym shaniah than eh ïa ka um kaba wan tang na ka wah Umïew ha Mawphlang kaba dei ka tyllong jong ka Greater Shillong Water Supply Scheme, kawei pat ka tyllong kaba tyrwa mynta ban bsa ïa ka New Shillong kadei ka wah Umkhen.
U ong ruh ba ka sorkar mynta ka shim bun ki lad ki lynti ban pynkhie im ïa ki tyllong um bad haba ïadei bad ka JJM ki la leh ruh ïa ka geo-tagging ïa baroh ki tyllong um khnang ba yn lah ban ïada ïa ki.
U Myntri u Myntri ruh ba haduh mynta kam shym la don kano kano ka por ba la buh haba ïadei bad ka JJM hynrei ka thong hi ka long ban pyndep ïa ka jingpyntrei kam ïa ka ha shwa u Lber 2024.