Shillong, Rymphang 19: U Bah Adelbert Nongrum, MLA ka VPP na North Shillong mynta ka sngi, u la kren da ka Ktien Khasi ha ïingdorbar Thawaiñ ka jylla, ban pynpaw ka jingbym sngew ïaiap halor ka jingkren lamphrang u Lat da ka Ktien Hindi bad ka kumjuh ruh ïa ka jingbym kren ne pule lut jong u ïa ki mat treikam jong ka sorkar.
Hadien ba la ïoh jingbit na u Shongknor ha ïingdorbar, namar ba ka lynti ka shah, u Bah Adelbert, u la ong ba ka Seng VPP bad kiba bun hi ki paidbah ka jylla kim pdiang satia ba u Lat un kren da ka ktien Hindi, namar ba ka Hindi kam dei ka Official Language jong ka jylla, wat lada kadei ka Official Language jong ka sorkar pdeng.
U la kynthoh ruh ïa ki katto katne, kynthup ïa ki riew pawkhmat kiba la ong ba ka Hindi kadei ka National Language. “Ym shym don hangno hangno ruh ki jingthoh ha ka Riti Synshar jong ka ri India ka ban ong ba ka Hindi kadei ka National Language”, la ong u Bah Nongrum. Kumta, u la ong ba ka jingkren jong ki kadei kaba ïalam bakla.
U la pynpaw ruh ka jinglyngngoh balei ba u Lat, u Phagu Chauhan um shym la kren ne pule lut ïa ki mat treikam jong ka sorkar. U la ong ba kaba kum kane ka jia tang ha ki jylla, ha kaba kam don ka jingïasngewthuh jingmut hapdeng u Lat bad ka sorkar jylla ne hapdeng ka sorkar jylla bad ka sorkar pdeng kumba ka la jia ha West Bengal bad ha Tamilnadu.
