Shillong, Rymphang 19 : U Myntri Rangbah barim ka Jylla Dr Mukul Sangma mynta ka Lah Sngi U Blei ula kyntu ïa ka Sorkar MDA ba kan sangeh noh na kaba leh politik ïa ka aiñ Meghalaya Residents Safety and Security Act (MRSSA), kaba dei ka aiñ ba la wanrah kyrpang da ka jingthmu ban tehlakam ïa ka jingwan rung kyrthep ki bar jylla bad poi wir shapoh ka Jylla.
Haba ïashim bynta ha ka jingïatai ïa ka jingkren u Lat, u Dr Mukul ula ong ba ka MRSSA ka dei kawei na ki aiñ ba biang bha kaba don ha kane ka pyrthei ban tehlakam ïa ka jingrung kyrteng ki bar jylla bad ki poi wir shapoh ka jylla. La mynjur lang ïa ka da ka ïing Dorbar Thaw Aiñ ha ryngkat ka jingïadon bynta lang jong ki kynhun bapher bapher ha ki snem bala leit noh.
“Kiba bun ki ri kynthup ka USA, UK ki dang wad ïa ki lad ki lynti kumno ban tehlakam ïa ki poiwir namar ba kim don satia ïa ka aiñ kum kane” ula ong haba bynrap “Nga kwah ban kyntu ïa baroh kynthup ka Sorkar ba kan kheiñ kongsan ïa kane ka aiñ ba donkam, kaba la wanrah na ka bynta ka bit ka biang jong ka Jylla. To ngin ym ïaleh politik ïa kane”.
Une u Myntri Rangbah barim ula kynnoh ba ïa kane ka aiñ la set ha ka duli pjah naduh u snem 2018 namar “Ngi rai ban ïaleh politik bad kane ka aiñ, kaba ktah ïa ka bha ka miat jong u paidbah”.
Nalor kane, une u Myntri Rangbah barim ula maham ïa ka Jylla ba ka bamsap ka dei kaba kham shyrkhei bad ktah ban ïa ki kam lehnoh, kaba lah ban ïalam sha ka lawei ka jingjot.
Haba kren halor ka jingtih dewiong beaiñ bad khaïi beaiñ, ula buh jingkylli la ka Sorkar ka nud ne em ban thung ïa ka jingtohkit ba laitluid bad ong ba ka jingleh bym hok kat kane ba jia mynta kan ym jia satia khlem ka jingtip jong ki briew kiba don ha ka bor.
