Shillong, Rymphang 19 : Ka Myntri ka Tnad ka Koit ka Khiah, ka Dr. Ampareen Lyngdoh ha ka sngi Nyngkong, kala pyntip ba kam pat don satia kano kano ka jingtyrwa ban seng ïa ka Medical College ha Ri-lum Jaintia.
Ka Myntri ka la ïathuh ïa kane, haba jubab ïa ka jingkylli ba la wanrah da u da u MLA ka UDP na Mookaiaw Bah Nujorki Sungoh. Haba jubab shuh shuh ïa ki jingkylli bynrap, ka Myntri ka la ong ba kam lah ban ai kano kano ka jingkular namar ka dei ka jingkular kaba heh bha. Hynrei wat la katta ruh ka kyrmen ba ha kawei ka sngi ka Jaiñtia Hills ruh kan ïoh ïa ka Medical College.
Haba pynpaw ia ka jingbym mynjur bad u Bah Nujorki ba ong ba ki jingtei jongka koit ka khiah ha ka thañ ka long kaba sniew bha, ka Myntri kala ong ba ka long kaba donkam ban leit ïuh kjat bad leit jurip sha kine ki jaka suar kiba la sniew bad i sangsot.
Kala ong ba ka Sorkar kam sa bun noh shen ia ka Radiology kat kum ka juk mynta ha Jowai Civil Hospital.
Haba wanrah ia ka jingkylli bynrap ha ka kynta kylli jingkylli, u Bah Nujorki ula pynpaw ïa ka jingsngewkhia halor ki jingtei jong ka tnad ka koit ka khiah ha Ri-lum Jaintia bad ong ba ki dei kiba don shibun ki jingduna.
Ula kyrpad ruh ia ka Sorkar ba kan mynjur ha kaban buh ia ka Primary Health Centre (PHC) ha Psiar kaba don ha khappud ka Assam. Kat kum ka jingong jong u, ka Shnong kala dep ban ai sngewbha haduh 4 acre ka jaka na ka bynta kane ka kam.
Halor kane, ka Myntri kala kular ba ka Sorkar kan sa khmih ia kane ka jingtyrwa.
“Ka jingtyrwa kala wan na Psiar. U MLA ula trei shitom bha bad ngi dang shong bishar ïa ki jingdonkam baroh bad ngin sa khmih la ka Psiar ka dei ne em ban ïoh ïa kane” kala ong.
