Nongstoiñ, Lber 29: Ki nongthoh khubor haba ïoh ban ïakren bad u bah R. Kharwanlang Executive Engineer ka MePDCL Nongstoiñ u la ong ba ka bill light duk kaba la poi haduh 1 lak 57 hajar tam, ka dei jong ka 15 snem kaba ym pat siew. Hynrei ki lah pat ban siew suki suki lyngba ka installment haduh 6 sien siew. Kino kino kiba lah ban bakla, ka ophis ka wer sha ka miej ban ïa pynbeit khnang ba kan ïaid beit ïaid ryntih.
Hynrei, na ka liang ka seng HNYM West Khasi Hills District hapoh ka jingïalam u bah Tailan Lyngkhoi Lamphang ka seng, ha ka sngi thohdieng ka la leit ban ïakynduh biang ïa u Executive Engineer ka MePDCL Nongstoiñ, ban kylli pyrthew shaphang ka kynrum kynram kaba la jia ha kaba ïa dei bad ki bill light kiba la poi da ki lak tyngka.
U bah Tailan Lyngkhoi u la ong ba katba ka seng ka nang ïaid ha ka lynti ban buddien ïa kitei ki kynrum kynram. Pynban, shibun sa kiwei pat ki paidbah ki la leit ban ujor bad ban ud sha ka seng, ha kaba kawei ka longïing kaba ring ne tan ïa ka Light kiba duk kata ka Free Connection kaba dei ban thang tang shi Bulb ruh ka la poi bill haduh 1 lak 57 hajar tam.
Kumta ka seng ka la ong ba lada ym lah ban ïashai bha haba ïadei bad kine ki kynrum kynram, khlem pep ka lah ban mih ka jingïakhih ruh ong u bah Tailan haba kren bad ki nongthoh khubor.
