Nongstoiñ, Lber 29: Ka Federation of Khasi Jaiñtia & Garo People Maweit Circle, kawei na ki tnad treikam jong ka seng kaba peit ïa ka bha ka miat ka shongsuk shong shngaiñ hapoh ka thaiñ, ha ka sngi thohdieng ka la leit ban jurip ïa katei ka jingpyntrei ïa katei ka Sub station ha kaba la dep ban pynbiang lut nadong shadong lait noh tang ka laiñ heh ban pynpoi light ha katei ka sub station kim pat don.
Kumta ka seng ka kyrpad sha ka bor ba dei khmih ban pynsted noh ban pyntreikam noh kham kloi, namar la shu ieh hangto ym don nongpeit nongsumar, ïoh hadien kan shu long tang kum ka jaka ban ïoh lad ki kam awria hapoh katei ka jaka. Ka seng ka da kyrpad jur ban pyntreikam noh kloi katba lah, khnang ba katei ka sub station kan ai noh ka jingshakri ïa ka dong ka thaiñ Maweit baroh kawei.
Ha ka jingleit jurip ka seng ka la lap ba ïa ki machine bad ka building la jan tap lut da ki ñiut, kaba la pynartatien ïa ka seng ïoh ba ka jingtei ïa katei ka Sub station, kan long tang ka jingpynbiej ïa ki paitbah jong ka thaiñ.
Kumta kum ka seng ngi buh ka jingkyrpad ha khmat ka burom jong ka ophis, ban shimkhia bad leh kham kloi ïa kane ka phang, khnang ba ki paitbah katei ka thaiñ kin ïoh jingmyntoi lyngba katei ka Sub station.
Na ka liang jong ka seng ka buh ruh ka jingkyrpad ban ker (fencing) ïa baroh ki machine hapoh ki shnong jong katei ka thaiñ, namar kane ka jingbuh machine khlem da ker ka buh jingma ïa ki khunlung khynnah bad kumjuh ïa ki jingri jingdup.
