Shillong, Lber 29: Ka Khasi Hill Autonomous District Council ka la pynthymmai biang ïa ka Khasi Traditional Medicine Commission ïa kaba yn khlieh da u Chief Executive Member (CEM) u Bah Shemborlang Rynjah.
Haba wanrah ïa kane ha sngi sdang jongka Dorbar Mang Tyngka, u Bah Shemborlang Rynjah u la pyntip ba kane ka Commission ka kynthup ruh ïa u Joint Secretary jong ka Executive Committee u Bah C Pohlong kum u Secretary bad saw ngut ki nongsumar tynrai Khasi ba pawnam kiba kynthup ïa u Dr. DL Nongspung, Dr. Alka Kharsati, Dr. Boss Myrthong bad Dr. Dlas Rani, nalor kiwei ki arngut ki nongsumar ha kiwei pat ki rukom sumar ba kynthup ïa u Dr. JP Lyngdoh bad Dr. Sparstarlin Nongrem.
La thung ruh saw ngut ki riewpawkhmat ha ka imlang sahlang ba kynthup ïa u Dr. PS Nianglang, Bah Fabian Lyngdoh, Bah Kitboklang Nongphlang bad Bah RS Wanniang kum ki dkhot.
Shuh shuh u CEM u la kdew ba ka kam bad ka kamram jong ka Commission ka long beit pat katkum ka Khasi Hills Autonomous District (Protection and Promotion of Khasi Traditional Medicine) Act, 2011 bad Rules jong ka.
