Shillong, Lber, 29: Ki shipai BSF Meghalaya na ka 144 Battalion ha ka sngi Thohdieng kiba la ïoh jingtip na ki tnat syntiat ha ka jingkhynra ha khappud jong ka South Garo Hills District ki la ïoh kurup 285 tylli ki dawai kuli Yaba.
Ha ka jingkhynra ïa kawei ka jaka khlaw, ki shipai BSF ki la lap ïa kawei ka song plastik rong iong ba la buhrieh bad ynda la lied ïa ka song la lap hapoh ka plastik ïa ki 285 tylli ki dawai kuli Yaba, kiba ju pyndonkam kum ki dawai jingdih pynbuaid ba long beaiñ ïa kiba la thmu ban khaii tuh sha ka ri Bangladesh.
Ïa kine ki dawai kuli Yaba la aiti noh sha ki Pulit jong kaGasuapara Police Station, South Garo Hills ban leh ïa kaba donkam katkum ki kyndon jong ka aiñ.
Ha kawei pat ka jingkhynra lyngba ka jingïoh jingtip na ki tnat syntiat, ki shipai BSF ki la ïoh ban pyllait im 19 tylli ki masi najan khappud jong ka West Jaiñtia Hills District ha ka sngi Thohdieng ha ka por mynstep.
Ïa kine ki masi ba la thmu ban khaii tuh sha ka ri Bangladesh la aiti noh sha ki Pulit ban leh kaba donkam katkum ki kyndon jong ka aiñ.
